दिपक बोहोरा, पाँचथर

ए डिभिजन मच्छिन्द्र क्लबलाई १-० ले हराउँदै शनिवार सप्तरीको नमोबुद्ध युथ क्लबले पाँचथर गोल्डकप फुटबल प्रतियोगिताको नयाँ च्याम्पियन बनेको छ ।

विदेशी खेलाडी एलेक्सको गोलमा नमोबुद्ध विजयी भएको हो । एलेक्सले खेलको ७३ औं मिनेटमा गोल गरेका हुन्। एलेक्सले पेनाल्टी एरियाबाट चलाखीपूर्ण गोल गरे ।

पहिलोपटक उपाधि जित्ने लक्ष्यसहित मैदान उत्रिएको मच्छिन्द्रले फाइनलमा आशा अनुरुप प्रदर्शन गर्न सकेन । मच्छिन्द्रले केही अवसर बनाए पनि सदुपयोग गर्न सकेन । १८ औं मिनेटमा इष्टोफिन गोल गर्न चुके ।

पहिलो हाफको इन्ज्युरी समयमा देवेन्द्रको प्रहार नमोबुद्धका कप्तान जियारथ शेखले पञ्च गरे । खेलको ८१औं मिनेटमा मच्छिन्द्रका युसुफ मलिसिखको प्रहार गोलकिपर जियारथले रोके ।

नमोबुद्धका निर्मल घिसिङ प्लेयर अफ दि म्याच घोषित भए । उनले ७ हजार ५ सय रुपैयाँ प्राप्त गरे।
नमोबुद्ध दोश्रो सहभागितामै च्याम्पियन बन्न सफल भएको हो । टोलीले क्वाटरफाइनल, सेमिफाइनल र फाइनल सबैमा ए डिभिजन क्लबलाई हराउँदै च्याम्पियन भयो ।

नमोबुद्धका प्रशिक्षकले खेलाडीको मिहिनेतले जित निकालेको बताए । उनले खेलाडीको तारिफ गर्दै योजनाअनुसार सफल भएको प्रतिक्रिया दिए ।

मच्छिन्द्रका प्रशिक्षक सविन अधिकारीले सामान्य गल्तीको कारण बेहोरेकि बताए । उनले खेलाडी लगातार खेलिरहेका कारण पनि नतिजा अनुकुल नआएको बताए । च्याम्पियन नमोबुद्धले ११ लाख र मच्छिन्द्रले ५ लाख ५५ हजार रुपैयाँ प्राप्त गर्यो ।

नमोबुद्धका दिपेश सर्वोत्कृष्ट

नमोबुद्धका दिपेश चाम्लिङ प्रतियोगिताको सर्वोत्कृष्ट घोषित भए। उनले १५ हजार रुपैयाँ प्राप्त गरे।

नमोबुद्ध जियारथ शेख उत्कृष्ट गोलकिपर, मच्छिन्द्रका देवेन्द्र तामाङ उत्कृष्ट डिफेन्डर, नमोबुद्धका विकेक राई उत्कृष्ट मिडफिल्ड , नमोबुद्ध धनकुमार तामाङ उत्कृष्ट प्रशिक्षक घोषित भए । उत्कृष्ट सबैले समान १० हजार रुपैयाँ प्राप्त गरे ।

समान ३ गोलका साथ चर्च ब्वाइज युनाइटेडका राज भुषाल र नमोबुद्धका एलेक्स सर्वाधिक गोलकर्ता रहे । पाँचथर क्लबका निरज लिङदेन उदियमान खेलाडी घोषित भए र उनले १५ हजार रुपैयाँ प्राप्त गरे।

फागुन २४ गतेदेखि सुरु भएको पाँचौ पाँचथर गोल्डकपमा ए डिभिजनसहित ८ टिमको सहभागिता रहेको थियो ।