चितोगोङ (हाम्रो खेलकुद)– बंगलादेशमा जारी शेख कमल अन्तर्राष्ट्रिय क्लब कप जित्न सके लक्ष्मी हुन्डाई मनाङ मस्र्याङ्दी क्लबका हरेक खेलाडीले १ लाख रुपैयाँ भन्दा पुरस्कार वापत पाउने भएका छन् । मनाङका अध्यक्ष मुखिया कान्छा गुरुङले टोलीले क्लब कप जिते पुरस्कार राशिको ५० प्रतिशत खेलाडीलाई दिने घोषणा गरेका छन् । क्लब कपको विजेताले ३० हजार तथा दोस्रो हुने टोलीले १ हजार ५ सय अमेरिकी डलर जित्नेछ ।

त्यसबाहेक व्यक्तिगत रुपमा पनि अध्यक्ष गुरुङले १० लाख रुपैयाँ खेलाडीलाई दिने घोषणा गरिसकेका छन् । उनले खेलाडीको मनोबल बढाउनका लागि पुरस्कारको घोषणा गरेको बताए । गुरुङले थपे,‘फाइनल पुगे पनि हामी पुरस्कार दिने विषयमा छलफल गरिरहेका छौं । अहिले सेमिफाइनल सम्म पुग्नु पनि नेपाली फुटबलका लागि सुखद सन्देश हो । ’

गत महिनामात्र सुदूरपश्चिमाञ्चल खप्तड गोल्डकप, आहा रारा गोल्डकप र रमपम झापा गोल्डकप जितेपछि मनाङ बंगलादेश यात्रामा निस्केको थियो । २३ खेलाडीसहित ३१ सदस्यीय जना मनाङ टोली बंगलादेश पुगेको छ ।

मनाङले सोमबार माल्दिभ्सको टिसी स्पोर्टस क्लबको सामना गर्दैछ । टिसी स्पोर्टस्को गोलपोस्ट नेपाली राष्ट्रिय टोलीका गोलकिपर किरण चेम्जोङले सम्हाल्नेछन् । किरण माल्दिभ्स जानुअघि मनाङबाटै व्यवसायिक फुटबल खेल्थे ।