हिमाल खरेल, मेचीनगर

सडनडेथमा धरान एफसीलाई पराजित गर्दै आयोजक काँकरभिट्टा फुटबल ट्रेनिङ सेन्टर पाँचौँ मेचीनगर गोल्डकपको फाइनलमा प्रवेश गरेको छ ।

आज निर्धारित ९० मिनेटमा १-१ को बराबरीमा सकिएपछि निर्णयका लागि खेल सोझै टाइब्रेकरमा धकेलिएको थियो । टाइब्रेकरमा पनि ४–४ गोलको बराबरी भएपछि निर्णय सडनडेथबाट लिइएको थियो ।

सडनडेथमा काँकरभिट्टाका विदेशी खेलाडी फ्रेन्कलिन तालाले गोल गरे । धरानका रोमन लिम्बूको प्रहार गोलकिपर विवश चौधरीले बचाए ।

टाइब्रेकरमा काँकरभिट्टाका अभिषेक गुरुङ, दिवस उराउ, निशान लिम्बू र विवेक गुरुङले गोल गरे । हेमन्त लिम्बूको प्रहार बारमा लागेर फर्किएको थियो ।

धरानका मिलन राई, सबिन राई, प्रज्ज्वल थापा, अजय विष्टको प्रहार गोल गरे । सुगम जिमीको प्रहार बाहिरिएको थियो ।
त्यसअघि खेलको ३४ औँ मिनेटमा धरानका कप्तान मिलन राईले मैदानको मध्यभागबाट सिङ्गल खेल्दै लगेर पेनाल्टी एरियामा सुरज रसाइलीलाई मिलाइदिएको सट गोलमा परिणत भयो ।

खेलको ७२ औँ मिनेटमा आयोजक काँकरभिट्टाले खेल बराबरी गरेको थियो । विवेक गुरुङले प्रहार गरेको कर्नरबाट आएको बललाई हेमन्त लिम्बूले हेडर गोल गरे ।

सातौँ मिनेटमा आयोजकका विदेशी खेलाडी इब्राइमको क्रसपासमा अर्का विदेशी खेलाडी एलेक्स गोल गर्नबाट चुके । सबै खेलाडी बिट भएको अवस्थामा पाएको मौकामा उनी चुके ।

३२ औँ मिनेटमा धरानका गोलरक्षक अगाडि बढेको समयमा इब्राहिमले गरेका भली प्रहार फ्रेममा पर्न सकेन । ४८ औँ मिनेटमा आयोजकका अभिषेक गुरुङले गरेको प्रहार धरानका गोलकिपर प्रविन लिम्बूले पञ्च गर्दै क्लियर गराए ।

खेलको २९ औँ मिनेटमा धरानका मिलन राईको हेडर गोलकिपर विवशले वान हेन्ड सेफ गरे । खेलको ८८ औँ मिनेटमा धरानले अग्रता लिन अवसरबाट चुक्यो । धरानका सुरज रसाइली र विवेक राईको प्रहार बारमा लागेर फर्कियो ।

काँकरभिट्टाका गोलकिपर विवश प्लेयर अफ दि म्याच भए। उनले ११ हजार रुपैयाँ र ट्रफी पाए । प्रतियोगिताभरिका प्लेयर अफ द म्याचको पुरस्कार व्यवसायी श्याम प्रसाईं (एसपी) ले उपलब्ध गराएका हुन् ।

उपाधिका लागि काँकरभिट्टाले बिहीबार हुने अन्तिम सेमिफाइनल खेल चर्च ब्वाइज युनाइटेड र मछिन्द्र फुटबल क्लबबीचको विजेतासँग प्रतिस्पर्धा गर्नेछ ।

काँकरभिट्टाका प्रशिक्षक मुन्ना सुब्बाले विपक्षी टिम होमसेट हुँदाहुँदै पनि जित निकाल्न सफल भएको बताए । उनले आफ्नो टिममा तालमेल मिल्न नसक्दा स्कोर बढाउन नसकेको स्वीकार गरे ।

धरानका प्रशिक्षक हेमकुमार गुरुङले खेलाडीले राम्रो खेल्दाखेल्दै पनि नजिता आफ्नो हातमा नपर्नु दुर्भाग्य भएको बताए । उनले निरन्तरको खेलतालिकाले खेलाडी थाकेका कारण पनि सोचेअनुरुप नतिजा ल्याउन नसकेको बताए ।

प्रतियोगिताको विजेता १० लाख र दोस्रो हुने टोलीले ५ लाख रुपैयाँ प्राप्त गर्नेछ।