काठमाडौं (हाम्रो खेलकुद) – शहिद स्मारक बी डिभिजन लिग अन्तर्गत श्री भगवती क्लब टोखाले रानी पोखरी कर्नर टिम (आरसीटी) लाई उत्कृष्ट कमब्याक गर्दै ३-१ ले हराएको छ ।

सातदोबाटो स्थिति एन्फा कम्पलेक्समा मंगलबार पहिलो हाफमै १० खेलाडीमा सिमित रहेको आरसीटीले खेलमा अग्रता लिएपनि त्यसलाई जोगाउन सकेन । ३३ औं मिनेटमा कप्तान समिर राईले विपक्षी कप्तान उर्केन शेर्पामाथि हात उठाएपछि आरिसिटी १० खेलाडीमा सिमित भएको थियो । कम खेलाडी हुनका बाबजुद ३६ औं मिनेटमा निखिल तामाङले गोल गर्दै आरसिटीलाई अग्रता दिलाए ।

श्री भगवतीको लागि भने दोस्रो हाफ सुखद रहयो । ५४ औं मिनेटमा विक्रान्त नरसिंह रानाले बराबरी गोल गरे । यसपछि ७७ औं मिनेटमा शिशिर लेखिको प्रहार डिफेन्डर अमर श्रेष्ठलाई लाग्दै गोलमा परिणत भएपछि टोखाले अग्रता लियो । खेलको अन्तिम मिनेटमा विशाल विक्रम शिलवालले जित पक्का गरे। उनले पेनाल्टी क्षेत्र बाहिरबाट गरेको प्रहार गोल भएको थियो ।

यससँगै श्री भगवती ३-१ को जितका साथ विजयी सुरूवात गर्न सफल भयो । लिग अन्तर्गत भोलि नयाँबस्ती युथ क्लब र ब्वाइज युनियन तथा बाँसबारी क्लब सरस्वती युथ क्लबबीच प्रतिस्पर्धा हुनेछ ।

लिगको विजेता टोलीले नगद १५ लाख प्राप्त गर्नेछ भने उपविजेता टोलीलाई नगद १० लाख पुरस्कार प्रदान गरिनेछ । त्यस्तै तेस्रो हुने टोलीले रु ५ लाख हात पार्नेछ । फेयर प्ले टिमलाई रु १ लाख, उत्कृष्ट खेलाडीलाई रु १ लाख, उत्कृष्ट गोलकिपर र सर्वाधिक गोलकर्तालाई ५० हजार प्रदान गरिनेछ ।