विराटनगर (हाम्रो खेलकुद)- सहिद स्मारक ए डिभिजन लिग च्याम्पियन चर्च ब्वाइज युनाइटेड विराटनगरमा जारी नवौं रमपम विराट गोल्डकपको फाइनलमा पुगेको छ ।

विराटनगर सहिद मैदानमा सोमवार भएको सेमिफाइनलमा विभागीय टोली नेपाल पुलिस क्बललाई १-० गोलले हराउँदै चर्च ब्वाइज उपाधि दाबेदार बनेको हो ।

लाक्पा पाख्रिनले गरेको गोलनै चर्च ब्वाइजको जितको लागि निर्णायक बन्यो । ७० औं मिनेटमा विदेशी खेलाडी एबायोमीले निकालको लामो पासलाई लाक्पाले गोल गरेका हुन् ।

चर्च ब्वाइजले बुधवार हुने फाइनलमा थ्री स्टार क्लबको सामना गर्नेछ । थ्री स्टारले आइतबार अर्को विभागीय टोली त्रिभुवन आर्मी एफसीलाई ३-२ ले निराश हराएको थियो ।

पटक–पटक अवसर पाए पनि विराट गोल्डकपको चौथो संस्करणको विजेता पुलिसले गोल फर्काउन नसक्दा टोलीको यात्रा सेमिफाइनलमै टुंगियो । पुलिस २०७२ को विराट गोल्डकपको विजेता टोली हो।

चर्च ब्वाइजले यसै महिनाको सुरुवातमा सम्पन्न २४ औं आहा रारा पोखरा गोल्डकपमा हारको बदला पनि विराट गोल्डकपमा आएर लिएको छ । माघ ३० गते सेमिफाइलनमा पुलिसले चर्च ब्वाइजलाई १-० गोलले पराजित गरेको थियो ।
चर्च ब्वाइजका गौरव श्रेष्ठ प्लेयर अफ दि घोषित भए र उनल ११ हजार रुपैयाँ प्राप्त गरे।
विराट गोल्डकपको विजेताले ११ लाख र दोस्रो टोलीले ५ लाख रुपैयाँ प्राप्त गर्नेछ ।