मेलबर्न (हाम्रो खेलकुद) – आयोजक यति एफसी फुटबल क्लबले १४औं कँडेल कन्सल्टेन्सी कप २०२५ को उपाधि उचालेको छ ।

रोयल वेष्टर्न क्लबलाई ३–२ ले पराजित गर्दै आयोजक यति फुटबल क्लब च्याम्पियन बनेको हो ।

अस्ट्रेलियाको मेलबर्न स्थित डेराविन इस्पोर्ट सेन्टरमा भएको फाइनल खेलमा आयोजक यतिका लागि कप्तान अभियान प्रधान, सुमन लामा र तेज तामाङले गोल गरे । आकाश बुढामगर र रवि थिङले रोयलका लागि गोल फर्काएपनि जित सम्भव भएन ।

प्लेयर अफ दि फाइनल समेत बनेका गोलरक्षक एलन न्यौपानेले उत्कृष्ट प्रदर्शन गरेका थिए । यतिले ट्रफीसहित १२ हजार अष्ट्रेलियन डलर जितेको छ । उपविजेता रोयलले ४ हजार ५ सय डलर प्राप्त गर्यो।

यस्तै ३५ वर्ष माथिको स्पर्धामा पनि यतिले नै बाजी मार्यो । यतिले मकआर्थर नेप्लिज क्लबलाई ४–३ ले पराजित गर्दै उपाधि जत्न सफल भयो ।

यतिका लागि सागर थापा, जुमानु राई, पंकज लामिछाने र युकेश श्रेष्ठले गोल गरे । युकेश प्लेयर अफ दि फाइनल बने ।

पराजित टिमका लागि अनिल गुरुङले २ तथा राजेशले १ गोल फर्काए । विजेता यतिले २ हजार ५ सय र उपविजेताले १ हजार डलर प्राप्त गरेको छ ।

व्यक्तिगत विधातर्फ आयोजक टिमकै खेलाडीको बर्चस्व रहयो । यतिका सुमन लामा सर्वोत्कृष्ट खेलाडी घोषित भए । यतीकै एलन न्यौपाने उत्कृष्ट गोलरक्षक र आशिष लामा सर्वाधिक गोलकर्ता बने । आशिषले ६ खेलमा १० गोल गरे ।

३५ बर्षमाथि सागर थापा र अनिल गुरुङले सर्वाधिक गोलकर्ताको पुरस्कार जिते । सागर प्रतियोगिताकै उत्कृष्ट घोषित हुँदा यतिकै कवुस अमात्य उत्कृष्ट गोलरक्षक बने । उनीहरु सबैले २ सय डलर हात पारे ।

एकदिने प्रतियोगितामा अष्ट्रेलियाका बिभिन्न राज्यबाट ४० टोलीको सहभागिता रहेको क्लबका उपाध्यक्ष तथा प्रतियोगिता संयोजक सज्जन शर्माले बताए ।