विराटनगर (हाम्रो खेलकुद )- थ्रीस्टार क्लब विराटनगरमा जारी नवौं रमपम विराट गोल्डकप फुटबल प्रतियोगिताको सेमिफाइनलमा पुगेको छ ।

विराटनगरको सहिद रंगशालामा शुक्रवार तेस्रो क्वाटरफाइननमा साविक विजेता मछिन्द्र एफसीलाई २-१ गोलले हराउँदै थ्री स्टार क्लब अन्तिम चारमा पुगेको छ।

थ्रीस्टारले सेमिफाइनल खेल विभागीय टिम त्रिभुवन आर्मीसँग प्रतिस्पर्धा गर्नेछ । पूर्व विजेता समेत रहेको थ्री स्टारलाई जित दिलाउन आशिष चापागाइ र दिपेश घलेले गोल गरे ।
१५ औं मिनेटमा आशिषले गोल गरे । एन्जल महर्जनले निकालेको क्रसलाई आशिषले डिबक्स भित्रबाट गोल गरे । २५ औं मिनेटमा दिपेशले गोल गर्दै टोलीलाई २-० ले अघि बढाए।

मछिन्द्रका कप्तान देवेन्द्र तामाङले खेल सकिन १ मिनेट बाँकी रहँदा गोल गरे । प्लेयर अफ दि म्याच थ्रीस्टारका दिपेश घलेले ११ हजार रुपैयाँ पाए ।
थ्री स्टारले कपिलबस्तु तिलौराकोट गोल्कडप फुटबल प्रतियोगिताको फाइनलमा बुधवार बेहोरेको हारको बदला विराट गोल्डकपमा आएर लिएको छ ।

कपिलबस्तु गोल्डकपको फाइनलमा थ्रीस्टारलाई मछिन्द्रले १–० गोलले पराजित गरेको थियो । त्यसअघि मच्छिन्द्रले सोमवार काठमाडौंमा केपी ओली कप जितेको थियो । शनिबारको अन्तिम क्वाटरफाइनल खेल चर्च व्वाईज युनाईट र एनआरटीबीच हुनेछ ।

महिलालाई निःशुल्क प्रवेश
१५ औं अन्तर्राष्ट्रिय नारी दिवसको अवसरमा शनिबार विराट गोल्डकप हेर्न आउने महिलाहरुको लागि आयोजकले निःशुल्क प्रवेशको व्यवस्था मिलाइएको विराट गोल्डकपका संयोजक नविन रिजालले जानकारी दिए ।