विराटनगर (हाम्रो खेलकुद)- त्रिभुवन आर्मी क्लब विराटनगरमा जारी नवौं रमपम विराट गोल्डकप फुटबल प्रतियोगिताको सेमिफाइनलमा पुगेको छ ।

विराटनगरको सहिद रंगशालामा बुधवार भएको पहिलो क्वाटरफाइनल खेलमा आर्मीले घरेलु टोल मोरङ ११ लाई १-० ले हराउँदै आर्मी अन्तिम चारमा पुगेको हो ।

आर्मीको जितमा निरज चौधरी नायक बने । उनले ३७ औं मिनेटमा गरेको गोलनै टोलीको जितका लागि पर्याप्त रह्यो।

दोस्रोे हाफमा आक्रमक खेल पस्किएपनि मोरङ ११ ले खेल बराबरीमा ल्याउन सकेन । पहिलो हाफमा आर्मीले केहि अवसर सिर्जना गरे पनि गोल थप्न सकेन । ३३ औं मिनेटमा निरजले गरेको कडा प्रहार मोरङका गोलकिपर पूर्ण चेम्जोङले बचाए ।

३४ औं मिनेटमा सुजन चौधरीले गरेको प्रहार फ्रेममा पर्न सकेन । आर्मीका ५० औ मिनेटमा दिनेश हेम्जनले डिबक्स भित्रदेखि गरेको प्रहारमा मोरङका गोलकिपर पूर्ण बाधक बने । लगत्तै निरान्जन धामीले गरेको प्रहार बाहिरियो । ५१ औं मिनेटमा आर्मीका नरेश खत्रीको प्रहार मोरङका गोलरक्षक पूर्णले बिफल पारिदिए ।

घरेलु दर्शकको साथ पाएको मोरङले गोल गर्ने थुप्रै अवसर खेर फाल्यो । ५३ औ मिनेटमा मोरङका भुवन बस्नेतले २५ यार्डबाट गरेको कडा प्रहार आर्मीका गोलकिपर विकेश कुथुले रोके । त्यसलगतै सुशिल राईले गोल गर्ने गतिलो अवसर गुमाए ।

मोरङका अभिषेक गुरुङले डिबक्स भित्रदेखि गरेको प्रहार बाहिरियो । ७० औ मिनेटमा दोर्जे तामाङ्गले डिबक्स नजिकदेखि गरेको प्रहार पनि पोस्ट माथिबाट बाहिरियो। आर्मीका गोलकिपर विकेश प्लेर अफ द म्याचघोषित र उनले ११ हजार रुपैयाँ पाए ।

नेपाल पुलिस क्लबले र एपिएफ फुटबल क्लबबीच बिहीवार दोस्रो क्वाटरफाइनल खेल हुनेछ।