एजेन्सी – इंग्लिस क्लब आर्सनलले नेदरल्यान्ड्समा पिएसभी आइन्डहोभेनलाई मंगलवार ७-१ को लज्जास्पद हार चखाउँदै च्याम्पियन्स लिगको अन्तिम १६ को दोस्रो लेगअघि बलियो अग्रता बनाएको छ।

आर्सनलले पहिलो हाफमा ३ गोल र बाँकी गोल दोस्रो हाफमा गर्यो । टोलीले प्रतियोगिताको क्वाटरफाइनलको सम्भावनालाई मजबुत बनाएको छ।

जुरियन टिम्बरले १८औं मिनेटमा आर्सनलको लागि गोलको खाता खोले। यसको ३ मिनेटपछि इथान न्वानेरीले अग्रता दोब्बर बनाए। त्यसपछि मिकेल मेरिनोले पिएसभीको डिफेन्सको गल्तीमा आर्सनलको लागि तेस्रो गोल गरे।

३-० ले पछि परेको पिएसभीलर पेनाल्टीको अवसर प्राप्त गर्यो। थोमस पार्टेले लुक डे जोङलाई फाउल गरेपछि नोआ लैङले गोल गरे। त्यो सँगै पहिलो हाफ ३-१ को नतिजामा सकियो।

दोस्रो हाफ दोस्रो मिनेटमा कप्तान मार्टिन ओडेगार्डले र त्यसको एक मिनेट बित्न नपाउँदै लिआन्द्रो ट्रोसार्डले गोल गर्दा आर्सनलले ५-१ को अग्रता बनायो।

७३ औं मिनेटमा ओडेगार्डले उत्कृष्ट गोलमार्फत व्यक्तिगत गोल संख्या २ पुर्याए । त्यसपछि खेल सकिन ५ मिनेट बाकी छँदा रिकार्डो कालाफियोरीले गोल गरे।

यो हारमा पिएसभीको फितलो डिफेन्स प्रमुख कारण बन्यो। यो वर्षको सुरुदेखि नै डच टोलीले १४ खेलमध्ये केवल एक खेलमा मात्र क्लिनसिट राखेको छ।

अन्तिम १६ को पहिलो लेगमा अन्य खेलमा
रियल म्याड्रिड ले एट्लेटिको म्याड्रिडलाई २-१ ले हराएको छ ।

रियलका लागि पहिलो गोल रोड्रिगो र निर्णायक गोल ब्राहिम डियाजले गरे। एट्लेटिकोका लागि जुलियन अल्भारेज गोल गरे।

एस्टन भिल्लाले क्लब ब्रुगलाई‌ ३-१ ले हरायो। बोरुसिया डर्टमन्ड र लस्क लिलले १-१ को बराबरी खेलका छन्।