दिपक बोहोरा,इलाम

एपिएफ फुटबल क्लब इलाममा जारी दोस्रो अन्तर्राष्ट्रिय आमन्त्रण महिला गोल्ड कप फुटबल प्रतियोगिता सेमिफाइनलमा पुगेको छ ।

ठूलो टुँडिखेलमा आज भएको अन्तिम क्वाटरफाइनल खेलमा एपिएफले गोलको वर्षा गर्दै अन्तिम चारको यात्रा तय गर्यो। एपिएफले नेपाल पुलिस क्लबसँग सेमिफाइनल खेल्नेछ।

एपिएफले भारत उत्तर प्रदेशको मदर टेरेसा एफसीमाथि १४-१ गोलको फराकिलो नतिजा निकाल्यो ।

एपिएफको जितमा रश्मिकुमारी घिसिङले ६ गोल, कप्तान अनिता बस्नेतले ह्याट्रिकसँगै ५ गोल गरिन् । अनिता केसी, मनमाया दमाइ र कुसुम खतिवडाले समान १ गोल गरे ।

छैंटौं मिनेटमा अनिता केसीको गोलमा एपिएफले अग्रता लियो। १२औं मिनेटमा मदर टेरेसाकी प्रतिज्ञा क्षेत्रीले बराबरी गोल गरिन् । त्यसपछि अनिता बस्नेत र रश्मिले पहिलो हाफमा ह्याट्रिक पूरा गरिन्‌।

अनिताले खेलको २१, २६ र ४०औं मिनेटमा गोल गर्दै ह्याट्रिक पूरा गरिन् । उनले ४२औं र ६१औं मिनेटमा गोल थपिन् ।

रश्मिले २३, ३१ र ४३औं मिनेटमा गोल गर्दै ह्याट्रिक पूरा गरिन् । उनले ४९, ५१ र ५८औं गोल थपिन् । मनमायाले ६८औं र कुसुमले ७५औं गोल गरिन् । रश्मि प्लेयर अफ दि म्याच घोषित भइन् र उनके ५ हजार रुपैयाँ पाइन् ।

आयोजक ओएसिस क्लब इलाम र विभागीय टोली त्रिभुवन आर्मी फुटबल क्लबबिच बुधवार पहिलो सेमीफाइनल हुनेछ।

फागुन २४ गते हुने फाइनलको विजेताले ४ लाख र दोस्रो टोलीले २ लाख रुपैयाँ प्राप्त गर्नेछ ।