काठमाडौं (हाम्रो खेलकुद)- नेपाली राष्ट्रिय महिला फुटबल टोलीकी प्रभावशाली मिडफिल्डर प्रीति राई सर्वोत्कृष्ट महिला फुटबल खेलाडी २०८१ बाट सम्मानित भएकी छिन्।

योङ स्टार फाउन्डेसनले आयोजित कार्यक्रममा प्रीतिलाई १ लाख रुपैयाँ सहित सम्मान गरिएको हो। फाउन्डेसनका अध्यक्ष मोहन चन्द्र सिंह र पूर्व खेलाडी ललित विक्रम शाहले सम्मान गरे।

कार्यक्रममा प्रीतिलाई एन्फा महिला लिगमा उत्कृष्ट खेलाडी भएकोमा यो सम्मान प्रदान गरिएको बताइएको छ। तर लिगमा यो पटक एपिएफकी सविता राना मगरले उत्कृष्ट खेलाडीको पुरस्कार प्राप्त गरेकी थिइन्।

लिगमा उत्कृष्ट खेलाडी नबने पनि प्रीति यो वर्ष पाउने सबै खाले सम्मान र अवार्डको भने हकदार हुन्। उनले वाफमा गरेको प्रदर्शन अनि निर्णायक गोल तारिफयोग्य छ।

काठमाडौं कात्तिकमा भएको साफ च्याम्पियनसिप र भर्खरै सम्पन्न फोर नेसन्स इन्टरनेसनल उमन्स च्याम्पियनसिपमा उच्च स्तर प्रदर्शन रहेको थियो।

युवा प्रतिभाशाली खेलाडी प्रीति नेपाली महिला राष्ट्रिय फुटबल टोलीकी महत्वपुर्ण सदस्य हुन्। सन् २०२१ मा उनले राष्ट्रिय टोलीबाट डेब्यु गरिन्। यसपछि उनले ५ गोल पनि गरेकी छिन्।

सम्मानपछि प्रीतिले सबैलाई धन्यवाद दिइन्। उनले पछिल्लो समय एन्फाले महिला टिमलाई दिएको प्राथमिकता र अवसरको प्रशंसा गरिन्।

विशेषगरी एन्फाले चोट ग्रस्त हुँदा गरेको सहयोग आफ्नो लागि महत्वपूर्ण रहेको पनि बताइन्। उनले नेपालाि महिला टोलीलाई प्रायोजन गरेर सहयोग गर्न आग्रह गरिन्। कार्यक्रम नेपाल खेलकुद पत्रकार मञ्चको सहकार्यमा भएको हो।