चितगोङ (हाम्रो खेलकुद) – बंगलादेशमा जारी शेख कमल अन्तर्राष्ट्रिय क्लब कपको सेमिफाइनल पुग्न लक्ष्मी हुन्डाई मनाङ मस्र्याङ्दी क्लबले समूह चरणको अन्तिम खेलको नतिजा कुर्नुपर्ने भएको छ।

आयोजक चितोगोङ अबहानीसँग २–० को अग्रता जोगाउन नसकी २–२ को बराबरी खेलेपछि मनाङले अन्तिम खेलको नतिजा कुर्नुपर्ने भएको हो । अन्तिम खेलमा बंगलादेशको मोहमोडन स्पोर्टिङ क्लबले अफगानिस्तानको शाहिन अस्मायीलाई हराएमा हेड टु हेडका आधारमा मनाङ अन्तिम चारमा पुग्नेछ । मनाङले मोहमडनलाई पहिलो खेलमा २–० ले हराएको थियो । त्यो खेल बराबरीमा रोकिए वा शाहिन जितेमा मनाङ बाहिरिनेछ । मनाङ दोस्रो खेलमा शाहिनसँग ३–१ ले पराजित भएको थियो ।

मनाङसँगको बराबरीपछि नै चितोगोङ ५ अंकसहित सेमिफाइनलमा पुगेको छ । आयोजक टोली समूहको विजेता वा उपविजेता भने अन्तिम खेलको नतिजा पछि मात्र टुंगिनेछ । २३ मिनेट भित्रै लिएको २–० को अग्रतालाई मनाङले जोगाउन सकेन । का लागि दुवै गोल ओलाडिपो ओलावाले आफिजले गरेका थिए । खेलको दोस्रो मिनेटमै उनले पहिलो गोल गर्दै मनाङलाई मजबुद अवस्थामा पुर्याएका थिए । विराज महर्जनको क्रसमा कप्तान अनिल गुरुङले हेडमार्फत पास दिएपछि आफिजले खाली पोस्टमा गोल गरे । २३ औं मिनेटमा उनले एकल प्रयासमा उत्कृष्ट गोल गर्दै गोलअन्तर दोब्बर पारेका थिए । अबाहनीका लागि नसरुद्दिन चौधरीले ३२ औं मिनेटमा गोल फर्काएका थिए । आफिजले पहिलो हाफको अन्त्यतिर ह्याट्रिकको अवसर गुमाएका थिए । दोस्रो हाफमा चितोगोङले बराबरी गोल फर्काएको थियो । देवेन्द्र तामाङले पेनाल्टी बक्समा बल ह्यान्ड गरेपछि चितोगोङले पेनाल्टी पाएको थियो । पेनाल्टीमा वाल्सनले चितगोङका लागि बराबरी गोल फर्काउँदै टोलीको अन्तिम चारको यात्रा पक्का गरेका थिए ।