सिड्नी (हाम्रो खेलकुद) – सगरमाथा फुटबल क्लब गोर्खा नेप्लिज कम्युनिटी (जिएनसी) फुटबल प्रिमियर लिग २०२४–२५को च्याम्पियन बनेको छ ।

२६औं संस्करणमा लिग चरणको एक खेल बाँकी छँदै च्याम्पियन बनिसकेको सगरमाथा अन्तिम खेलमा भने फेवा फुटबल क्लबसँग १–० ले पराजित भएको छ । लिगको अन्तिम चरणका खेलहरु आइतवार नोरफोर्ड पार्क सिड्नीमा भएको थियो ।

यो सिजन उच्च प्रदर्शन गर्दै लिगको अन्तिम खेल अघिसम्म अपराजित रहेको सगरमाथाले १० खेलबाट ९ जित र एक बराबरीबाट २८ अंक बटुल्दै च्याम्पियन बनिसकेको थियो ।

लिग चरणको १०औं खेलमा दि राइजिङ गोर्खाज एफसीलाई १–१ गोलको बराबरीमा रोक्न सफल भएपछि सगरमाथा च्याम्पियन बन्ने पक्का भएको थियो । च्याम्पियन सगरमाथाले ११ खेलबाट २८ अंक बटुल्यो ।
सगरमाथा दोस्रोपटक जिएनसी लिगको च्याम्पियन बनेको हो । यसअघि सगरमाथा २०२१–२२ को सिजनमा च्याम्पियन बनेको थियो ।

नेपाली राष्ट्रिय टोली तथा विभागीय नेपाल पुलिस क्लबका पूर्व फरवार्ड जुमानु राईको प्रशिक्षणमा रहेको सगरमाथामा राष्ट्रिय टोलीबाट खेलिसकेका दिलेन लोत्ताम, सौजन याख्खा राई, राजेन्द्र रावल र हिसुव थपलियाको साथ रहेको थियो ।

खेलाडी जीवनबाट २०८० जेठमा सन्यासको घोषणा गरेका जुमानुले सोही वर्ष पुसमा नेपाल प्रहरीको नायव निरिक्षक (सई) मा अवकाश लिएपछि अस्ट्रेलिया आएका थिए ।

त्यसपछि सगरमाथाले उनलाई क्लबको मुख्य प्रशिक्षकको जिम्मेवारी प्रदान गरेका थिए । उनले आफ्नो पहिलो कार्यकालमा नै क्लबलाई लिग च्याम्पियन बनाउन सफल भएका हुन् ।

घरेलु फुटबलमा पुलिसबाट खेलेका राईले नेपालको राष्ट्रिय टोलीबाट ५१ क्याप जित्दा ११ अन्तर्राष्ट्रिय गोल गरेका थिए।

गत वर्षको विजेता सेन्ट जर्ज नेप्लिज क्लब च्याम्पियन बनेको थियो । यसपल्ट सेन्ट जर्जले तेस्रो हुँदा दि राइजिङ गोर्खाज एफसीले दोस्रो स्थान हासिल गर्यो । द राइजिङले २४ तथा सेन्ट जर्जले २३ अंक बटुल्यो ।

फेवा, बेनी, वेस्ट युनाइटेड, डाँफे, क्लब नेपाल, ग्रानभिल, माछापुच्छ्रे, पारा पार्क र हिमालयन क्रमश चौथो देखि १२औं स्थानमा रह्यो ।

गोर्खा नेप्लिज कम्युनिटीले हरेक वर्ष (जिएनसी) फुटबल प्रिमियर लिगसँगै जिएनसी शिल्ड आयोजना गर्ने गर्दछ । यस लिगमा सहभागिता जनाउने खेल्ने अधिकांश क्लबमा नेपाली राष्ट्रिय टोलीबाट खेलिसकेका खेलाडीहरु आबद्ध छन् ।

जिएनसी प्रिमियर लिगमा शीर्ष चारमा रहने टोलीले जिएनसी शिल्ड खेल्नेछ । जिएनसी लिगमा मेजर, माइनर र भेट्रान गरी तीन लिग हुनेछ ।