काठमाडौं (हाम्रो खेलकुद) – मिडफिल्डर रोहन कार्कीलाई रिटेन गर्दै नेपाल सुपर क्लब (एनएसएल) को फ्रेन्चाइज टोली काठमाडौं रेजर्सले तेस्रो सिजनका लागि ३ खेलाडी रिटेन गरेको छ ।

गत सिजन ट्यालेन्ट हन्टमार्फत धनगढी एफसीबाट खेल्दै प्रतियोगिताको उदीयमान खेलाडी घोषित रोहनले यस सिजन काठमाडौंको मार्कीको भूमिकामा खेल्ने भएका हुन् । रोहन सी डिभिजन लिगमा आरसी३२ फुटबल क्लबको कप्तानी गर्दै बी डिभिजनमा उकालेपछि चर्चामा आएका थिए । त्यसयता उनले एनएसएल हुँदै राष्ट्रिय टोलीबाट डेब्यु समेत गरिसकेका छन् ।

रोहन पछिल्लो समय चर्च ब्वाइज युनाइटेडबाट मोफसलका प्रतियोगिता खेल्दै आएका छन् । उनी एएफसी च्यालेन्ज कपको प्लेअफ खेलमा पनि चर्च ब्वाइजबाट खेलेका थिए । मिडफिल्डर रोहन उनको पास दिने क्षमताका लागि परिचित छन् । सेन्टर मिडफिल्डमा खेल्ने उनले पछिल्लो समय आफूलाई देशको उत्कृष्ट मिडफिल्डरको रुपमा चिनाएका छन् ।

काठमाडौंले रोहनसँगै मिडफिल्डर दीपेश गुरुङ, डिफेन्डर कुलदिप कार्की र गोलरक्षक अभिषेक बराललाई पनि रिटेन गरेको छ । पहिलो सिजनको विजेता रेजर्सले दोस्रो सिजनमा भने प्लेअफको पहिलो खेलमा हार बेहोरेको थियो । ललितपुरसँग एलिमिनेटरमा हारेपछि रेजर्स बाहिरिएको थियो ।

यस सिजनका लागि भने क्लबले प्रशिक्षक सार्वजनिक गरिसकेको छैन । सुरुवाती दुवै सिजन बालगोपाल महर्जन टोलीको प्रशिक्षक रहेका थिए । यस सिजन भने क्लबले नयाँ प्रशिक्षक नियुक्त गर्ने तयारी गरिरहेको बुझिएको छ ।

एनएसएलको नयाँ सिजन चैत्र १६, २०८१ (मार्च २९, २०२५) बाट सुरु हुँदैछ । ७ टोली सहभागी रहने लिगका लागि अक्सन फागुन १० गते शनिबार हुँदैछ ।