दिपक न्यौपाने
बुटबल (हाम्रो खेलुकद) – त्रिभुवन आर्मी क्लबले १९ औं तिलोत्तमा गोल्डकप नकआउट फुटबल प्रतियोगितामा शुक्रबार भारतको युनाइटेड सिक्किमको सामना गर्नेछ । पुसमा टुगोर्ब हेटौडा गोल्डकप जितेयता आर्मीले कुनै उपाधि जितेको छैन ।

पछिल्लो पटक टोलीले रुस्लान आठौं सिमरा गोल्डकपको फाइनल खेलेको थियो । जहाँ आर्मी अर्को ए डिभिजन टोली सिएमजी क्लब संकटासँग पराजित भएको थियो । युनाइटेड सिक्किमले गत महिना पोखराको आहा रारा गोल्डकपमा भाग लिएपनि टोली पहिलो खेलमै पराजित भएको थियो ।

तिलोत्तममाको बिहीबार भएको उद्घाटन खेलमा एपिएफले भारत कालिङपोङको सेरे एफसीलाई १–० ले हराएको थियो । मोसफलकै प्रतिष्ठित गोल्डकप मध्येको एक तिलोत्तमा २०३३ सालबाट सुरु भएपनि पटक पटक आर्थिक अभाव र अन्य कारणले रोकिने गथ्थ्यो । गत बर्ष भने प्रतियोगिताले पुनः निरन्तरता पाएको छ । यसपटक प्रतियोगितालाई अग्नी सिमेन्टले मुख्य प्रायोजन गरेको छ ।

बुटवल उप महानगरपालिकाको संरक्षणमा संचालन हुने प्रतियोगितालाई करेन्ट मसला र हुवाइ मोबाइल सहयोग प्रायोजन गरेका छन् । त्यस्तै अखिल नेपाल फुटबल सघं (एन्फा), राष्ट्रिय खेलकुद परिषद (राखेप) र रुपन्देही जिल्ला विकास समिति प्रतियोगिताको विशेष सहयोगीका रुपमा रहेका छन् । तिलोत्तमा गोल्डकपको विजेता टोलीले उपाधिसहित ५ लाख ५५ हजार ५ सय ५५ रुपैयाँ प्राप्त गर्नेछ ।