काठमाडौं (हाम्रो खेलकुद )- म्यानमारले लगातार दोस्रो जित निकाल्दै फोर नेसन्स उमन्स इन्टरनेसनल फुटबल च्यान्पियनसिपको फाइनल पुग्ने सम्भावनालाई बलियो बनाएको छ।

दशरथ रंगशालामा बिहीवारको पहिलो खेलमा म्यानमारको कीर्गिस्तानलाई ५-० ले हराउँदै फाइनल पुग्ने सम्भावना मजबुत पारेको हो ।

एकपक्षिय खेलमा म्यानमारको जितमा मे टेट लु र योन वाडी लेङले समान २ र सानदार लिनले १ गोल गरिन्।

दोस्रो मिनेटमा नै म्यानमारले अग्रता बनायो। कप्तान सानदार लिनको क्रसमा वाडी लेङले गोल गरिन्। नवौँ मिनेटमा कीर्गिस्तानकी एलिखान टर्मसको प्रहार म्यानमारकी गोलरक्षकले पन्च गर्दै बचाइन्। खेलको ३० औँ मिनेटमा म्यानमारले अग्रता दुगुना गर्यो। लिनले सानदार गोल गरिन्।

खेलको ३६ औँ मिनेटमा योन वाडीको पासमा मे टेट लुको हेडर गोलमा म्यानमार ३–० को अग्रता बनायो। खेलको ४१ औँ मिनेटमा युन वाडी लिङले गोल गर्दा म्यानमारले पहिलो हाफमा ४–० को अग्रता बनायो। डिबक्स भित्रबाट गरेको उनको प्रहार क्रसबारमा लाग्दै गोलमा परिणत भएको थियो।

यसपछि ४९ औं मिनेटमा मे टुटले व्यक्तिगत दोस्रो गोल गर्दा म्यानमारले ५-० को स्पष्ट अग्रता बनायो।

म्यानमारले २ खेलबाट ६ अंक जोड्दै फाइनल पुग्ने संभावनालाई बलियो बनाएको छ। उसले पहिलो खेलमा लेबनानलाई ३-१ ले हराएको थियो।

कीर्गिजस्तानको यो दोस्रो हार हो। किर्गिजस्तान पहिलो खेलमा नेपालसँग १-० ले हारेको थियो। आज साँझ ६ बजे सुरु हुने दोस्रो खेलमा नेपाल र लेबनानबीच प्रतिस्पर्धा हुनेछ।