एजेन्सी – स्पेनिस क्लब रियल मड्रिडले इङ्ग्लिस क्लब म्यानचेस्टर सिटीमाथि च्याम्पियन्स लिग प्लेअफको पहिलो लेगमा रोमाञ्चक जित निकालेको छ ।

रियलले बुधवार सिटीमाथि ३-२ को जित निकालेको हो । दुई पटक खेलमा पछि परेर पनि रियल नतिजा उल्टाउन सफल‌ भयो।

सिटीको मैदानमा भएको खेलमा रियलको जितमा किलियन एमबाप्पे, ब्राहिम डियाज र जुड बेलिंघमले समान गोल गरे । सिटीका लागि भने दुवै गोल एर्लिङ हाल्याण्डले गरे ।

१९औं मिनेटमा सिटीका लागि हाल्याण्डले गोल गरे। ६०औं मिनेटमा एमबाप्पेले गोल गर्दै रियललाई १-१ को बराबरीमा ल्याएका । ८०औं मिनेटमा हाल्याण्डले पेनाल्टी मार्फत गोल गर्दै सिटीलाई पुन अग्रता दिलाए । त्यसको ६ मिनेट पछि डियाजले गोल गरेपछि रियलले दोस्रो पटक खेलमा बराबरी गर्यो।

इन्ज्युरी समयमा बेलिंघमले गोल गर्दै रियललाई महत्वपुर्ण जित दिलाए । दोस्रो लेग २० फेब्रुअरीमा छ ।

रियल र सिटी दुवैले च्याम्पियन्स लिगको नयाँ लिग-चरण प्रारुपमा शीर्ष आठ भित्र स्थान बनाउन नसक्दा स्वतः अन्तिम १६ मा पुग्न असफल रहेका थिए ।

रियल ११औं स्थानमा रह्यो भने सिटी २२औं स्थानमा रहेपछि दुई लेगको प्लेअफ खेल्नुपर्ने भएको थियो । दुई लेगमा जित दर्ज गर्ने टोली अन्तिम १६ मा पुग्नेछ । रियल र सिटीबीचको विजेताले एट्लेटिको मड्रिड वा बायर लेभरकुसेनमध्ये एकसँग प्रतिस्पर्धा गर्नुपर्नेछ।

इंग्लिस प्रिमियर लिगमा पनि सिटीले निराशाजनक प्रदर्शन गरिरहेको छ । लिग तालिकामा पाँचौं स्थानमा रहेको सिटी शीर्षस्थानको लिभरपुलभन्दा १५ अंकले पछि परेको छ।