पोखरा (हाम्रो खेलकुद)- २४ औं आहा! रारा पोखरा गोल्डकप फुटबल प्रतियोगिताको दोस्रो क्वाटरफाइनलमा आज सहिद स्मारक ए डिभिजन लिगका दुई टोली थ्री स्टार क्लबले र मच्छिन्द्र एफसीबिच प्रतिस्पर्धा हुँदैछ।

पोखरा रंगशालामा खेल दिउँसो २:३० बजे सुरु हुनेछ।
५ पटकको आहा रारा विजेता थ्री स्टारले यसपटक सिधै क्वाटरफाइनलमा प्रवेश पाएको थियो।

मच्छिन्द्रले भने पहिलो खेलमा पूर्व विजेता एपिएफ फुटबल क्लबलाई २-० ले हराएर क्वाटरफाइनलको यात्रा तय गरेको थियो।

थ्री स्टार यो सिजन पहिलो खेल आज खेल्दैछ। मच्छिन्द्रले भने १० दिन अघि काठमाडौंमा भएको सभापति कपमा सेमिफाइनल खेलेको थियो। त्यहाँ पनि पहिलो खेलमा एपिएफलाई हराएको मच्छिन्द्र सेमिफाइनलमा संकटासँग पराजित भएको थियो।

थ्री स्टार आहा सर्वाधिक सफल टोलीको दोस्रो स्थानमा छ । मच्छिन्द्र भने अहिले सम्म आहा राराको फाइनल पुग्न सकेको छैन। मच्छिन्द्र विदेशी, राष्ट्रिय टोलीका सदस्य र अनुभवी खेलाडीसहित सन्तुलित टोली हो।

थ्री स्टारले नयाँ संरचनासहित अघि बढेको छ । त्यसमा केहि विदेशी, युवा र केहि अनुभवी खेलाडी छन्।
२०६३ मा पहिलो पटक आहा रारा जितेको थ्री स्टार पछिल्लो पटक २०७५ च्याम्पियन बनेको थियो। २०६७, २०६९ र २०७१ मा पनि थ्री स्टार विजेता बनेर फर्केको थियो।

गत वर्षको फाइनलमा त्रिभुवन आर्मी फुटबल क्लबसँग
पराजित थ्री स्टार २०६५,२०६६,२०७४ को संस्करणमा पनि उपविजेता बनेको थियो। आहा रारामा थ्री स्टार भन्दा बढी नेपाल पुलिस क्लब र मनाङ मस्र्याङ्दी क्लबले समान ६ पटक उपाधि जितेका छन्।

संंकटाले २,  अफ्रिकन युनाइटेड, आयोजक सहारा, एपिएफ र आर्मी समान १ पटक उपाधि जितेका छन्।