पोखरा (हाम्रो खेलकुद)- आहा! रारा पोखरा गोल्डकप फुटबल प्रतियोगिताको दुई पटकको च्याम्पियन संकटा क्लबले यसपटक प्रि क्वाटरफाइनलबाट आफ्नो यात्रा सुरु गर्दैछ।

पोखरा रंगशाला जारी आहा राराको २४ औं‌ संस्करणको अन्तिम प्रि क्वाटरफाइनलमा आज संकटाले भारत सिक्किमको थन्डरबोल्ट युनाइटेडको सामना गर्नेछ।

पछिल्लो ४ वर्षमा दुईपटक च्याम्पियन बनेको संकटा आहामा सर्वाधिक सफल टोली मध्ये चौथोमा पर्दछ। नेपाल पुलिस क्लब र मनाङ मस्र्याङ्दी क्लबले सर्वाधिक समान ६ पटक, थ्री स्टार क्लबले ५ पटक र त्यसपछि संकटा दुई च्याम्पियन बनेको थियो।

आयोजक सहारा क्लब, अफ्रिकन युनाइटेड, एपिएफ फुटबल क्लब र त्रिभुवन आर्मी फुटबल क्लब समान १ पटक च्याम्पियन बनेका थिए। यसपटक पूर्व विजेता आयोजक सहारा , एपिएफसँगै एनआरटी आफ्नो पहिलो खेलमै पराजित भएर प्रतियोगिताबाट बाहिरिसकेका छन् ।

पुलिस, मच्छिन्द्र फुटबल क्लब र सहिद स्मारक ए डिभिजन लिग च्याम्पियन चर्च ब्वाइज युनाइटेड आहा राराको क्वाटरफाइनलमा पुगिसकेका छन् । आर्मी ,थ्री स्टार, ब्रिगेड ब्वाइज युके र उज्वेकिस्तानको बिग बुल्सले क्वाटरफाइनलबाट खेल्नेछन्।

संकटा २०७७ मा पहिलो पटक र २०७९ मा दोस्रो पटक आहा रारामा च्याम्पियन बनेको थियो। अफ्रिकन रुटलाई पेनाल्टीमा ४-२ ले हराउँदै संकटा पहिलो पटक च्याम्पियन बनेको थियो। निर्धारित र थप समयमा १-१ को बराबरीपछि टाइब्रेकरमा बाजी मारेको थियो। संकटा दुई वर्षअघि विजेता बन्दा बिवाइएससी युएसएलाई ३-२ ले पराजित गरेको थियो।

संकटाले पछिल्लो पटक माघ १७ गते दशरथ रंगशालामा भएको सभापति कपको उपाधि जितेको थियो। आयोजकको बागमतीलाई हराएपछि संकटा आज पहिलो पटक मैदान उत्रदैछ । सभापति कपका सर्वोत्कृष्ट खेलाडी बनेका दीप कार्कीको कप्तानीमा आहा राराको यात्रा सुरु गर्नेछ।