प्याराडाइजलाई राइजिङ भरतपुर गोल्डकपको उपाधि

सुशील पन्त क्षेत्री, चितवन

प्याराडाइज युथ क्लब रत्ननगरले मिनान्नो राइजिङ भरतपुर गोल्डकपको उपाधि जितेको छ ।

बागमती युथ क्लब सर्लाहीलाई शनिवार १-० ले हराउँदै प्याराडाइज च्याम्पियन बनेको हो ।

नेपाल प्रहरी शिक्षालय भरतपुर तालिमकेन्द्रको मैदानमा भएको फाइनलमा प्याराडाइजलाई च्याम्पियन बनाउन मोहित गुरुङले निर्णायक गोल गरे । दोस्रो हाफको १५ औं मिनेटमा मैदान प्रवेश गरेका मोहितले १६ औं मिनेटमा निर्णायक गोल गरे ।

खेलको अन्त्यतिर बागमतीले राम्रो अवसरहरु बनाए पनि गोल गर्न सकेन । निर्णायक गोल गरेक मोहित प्लेयर अफ दि म्याच चुनिए । च्याम्पियन बनेको प्याराडाइजले ट्रफीसहित ७ लाख र दोस्रो बागमतीले ३ लाखमा रुपैयाँ प्राप्त गर्यो ।

बागमतीका राज भुसाल प्लेयर अफ दि सिरिज भए । यस्तै प्याराडाइजका अभिषेक बराल उत्कृष्ट गोलरक्षक र प्याराडाइजकै जीवन गुरुङ उत्कृष्ट डिफेन्डर बने । उनीहरुले समान १० हजार रुपैयाँ प्राप्त गरे ।