काठमाडौं (हाम्रो खेलकुद)- ए डिभिजन टोली संकटा क्लब र बागमती (नेपाल लोकतान्त्रिक खेलकुद संघ बागमती प्रदेश) ले आज सभापति कप फुटबल प्रतियोगिताको फाइनल खेल्दैछन् ।

दुवै टिलीले उपाधि जित्ने आशा राखेका छन् । त्रिपुरेश्वरस्थित दशरथ रंगशालामा खेल साँझ ५:३० बजे सुरु हुनेछ।

संकटाका प्रशिक्षक रविन्द्र शिलाकारले उपाधि जितेपछि ट्रफी सानो वा ठूलो नहुने बताए । उनले पहिलो दुई खेलको सफलताले टोलीको मनोबल उच्च रहेको बताएका थिए।

संकटाका कप्तान दीप कार्कीले फाइनल जित्नकै लागि मैदान उत्रिने बताउँदै तयारी राम्रो रहेको बताएका थिए ।

बागमती‌ कप्तान विकेश कुथुले संकटा सेट टिम भएको बताउँदै आफूहरु पनि कडा चुनौती दिन तयार रहेको बताएका थिए । विपक्षीलाई कमजोर नठान्ने पनि उनले प्रष्ट पारेका थिए ।

बागमतीका प्रशिक्षक प्रकाश बैद्यले यसअघि देखिएका कमजोरीहरुमा सुधार गर्दै फाइनल जित्ने लक्ष्य रहेको सुनाएकस थिए ।

सेमिफाइनलमा संकटाले मच्छिन्द्र क्लबलाई सडनडेथमा र बागमतीले एनआरटीलाई टाई ब्रेकरमा ४- २ गोलले हराउँदै एकअर्कासँगको भेट पक्का गरेका थिए।
फाइनल अघि रंगशालामा झाँकीसहितको प्रस्तुति रहने आयोजकले जनाएको छ ।

प्रतियोगिताको विजेताले २६ लाख र दोस्रो टोली १३ लाख रुपैयाँ प्राप्त गर्ने छ । प्रतियोगिताको सर्वोत्कृष्ट खेलाडीले ७५ हजार, उत्कृष्ट गोलकिपरले , सर्वाधिक गोलकर्ताले समान ५० हजार र उदीयमान खेलाडीकले २५ हजार रुपैयाँ पाउनेछन् ।

आयोजक नेपाली कांग्रेस लोकतान्त्रिक खेलकुद संघ महाधिवेशन निर्देशन समितिले फाइनल खेलका लागि साधारणतर्फ २ सय र भिआइपीतर्फ ५ सय रुपैयाँ टिकट दर तोकेको जनाएको छ ।