पाँचथर गोल्डकप अर्को महिना

दिपक बोहोरा, पाँचथर

पाँचथर गोल्डकप प्रतियोगिताको पाँचौ संस्करण अर्को महिना आयोजना हुने भएको छ।

फिदिम माविको खेल मैदानमा फागुन २४ देखि चैत २ गतेसम्म हुने प्रतियोगितामा नेपाल र भारतका गरि ८ टोलीको सहभागिता रहने आयोजक पाँचथर क्लबले आइतवार पत्रकार सम्मेलन गर्दै जानकारी दिएको छ ।

विजेताले ११ लाख १ हजार १ सय ११ रुपैयाँ र दोस्रो हुने टोलीले ५ लाख ५५ हजार ५ सय ५५ रुपैयाँ ट्रफी प्राप्त गर्नेछ । गत वर्षको‌ तुलनामा पुरस्कार राशिमा दोब्बर बृद्धि गरिएको बताइएको छ।

प्रतियोगितामा सहिद स्मारक ए डिभिजन लिगका ४ सहित बी‌ डिभिजन, आयोजक र विदेशी टोलीको सहभागिता रहने क्लबका अध्यक्ष कमल तुम्रोकले जानकारी दिए ।

प्रतियोगितामा सर्वोत्कृष्ट खेलाडी, उत्कृष्ट गोल किपर, डिफेन्डर, मिटफिल्ड, प्रशिक्षक, सर्वाधिक गोलकर्ता र उदयमान खेलाडीलाई पुरस्कृत गरिने बताइएको छ। प्रतियोगितामा खेलाडी, अफिसियल, रेफ्रीसहित २ सय जनाको सामुहिक दुर्घटना बिमा पनि गरिने आयोजकले जनाएको छ ।

चौंथो पाँचथर गोल्डकपको उपाधि त्रिभुवन आर्मी फुटबल क्लबले जितेको थियो ।