सनमको गोलमा बागमती विजयी

सुशील पन्त क्षेत्री,चितवन

बागमती युवा क्लबले मिन्नानो राईजिङ भरतपुर गोल्डकप फुटबल प्रतियोगितामा आइतवार सूर्यपुर फुटबल क्लबलाई १-० ले हराएको छ।

नेपाल प्रहरी शिक्षालयको मैदानमा भएको खेलमा बागमतीको जितमा सनम धिमालले निर्णायक गोल गरे । उनले खेलको २० औं मिनेटमा गरेको गोल नै बागमतीलाई जिताउन पर्याप्त भयो ।

दोस्रो हाफमा सूर्यपुरले केही मौका पाए पनि सदुपयोग गर्न सकेन । बागमतीको जितमा निर्णायक गोल गरेका सनम प्लेयर अफ दि म्याच भए । यो जितपछि बागमती सेमिफाइनल प्रवेश गरेको छ ।

प्रतियोगितामा सोमवार गैंडाकोट फुटबल क्लब र प्याराडाईज युवा क्लबबिचको खेल दिउँसो ३:०० बजे सुरु हुनेछ।

माघ १९ गतेसम्म चल्ने प्रतियोगिताको विजेताले ट्रफीसहित ७ लाख र दोस्रो हुने टोलीले ३ लाख प्राप्त गर्नेछ । प्रतियोगितामा ए डिभिजनसहित ८ टोली सहभागी छन् ।