पोखरा (हाम्रो खेलकुद) –   बगर भाइखलकको आयोजनमा अर्को साता आयोजना हुने १४ औं अन्तर्राष्ट्रिय भेट्रान्स एट ए साइड फुटबल प्रतियोगिताको तयारी पूरा भएको छ ।

बगर भाइखलकले आज पोखरामा पत्रकार सम्मेलन गर्दै  पोखराको टुडिखेल फुटबल मैदानमा माघ १५ देखि २१ गतेसम्म आयोजना हुने प्रतियोगिताको तयारी पूरा भएको जानकारी दिएको हो । 

बगर भाइखलकका महासचिव मनकाजी गुरुङले अन्तर्राष्ट्रिय भेट्रान्स एट ए साइड फुटबल प्रतियोगितामा विभिन्न उमेर समूहमा विदेशीसहित ३९ टोलीको सहभागिता रहने बताए।

‘स्वास्थ्यको लागि एक घण्टा व्यायाम, नागरिकहरुका लागि नौलो आयाम’ भन्ने नाराका‌ साथ २०६८ सालदेखि भेट्रान्स फुटबल आयोजना गर्दै आएका छौं,’ महासचिव गुरुङले भने।’

महासचिव गुरुङले ४० वर्षदेखि ७० वर्ष उमेर समूहका पाका खेलाडीहरुको खेलबाट नयाँ पुस्तालाई खेलकुद प्रति अभिरुची जगाई  भविष्यमा खेलाडी उत्पादन गर्ने लक्ष्यसमेत राखेको बताए ।

तीन विधामा हुने अन्तर्राष्ट्रिय भेट्रान्स एट ए साइड फुटबल प्रतियोगितामा ४० वर्ष उमेर पूरा भएको विधामा १९ टोली, ५० वर्ष उमेर समूहतर्फ १४ टोली र ६० वर्ष उमेर पूरा भएका ६ टोलीबीच प्रतिस्पर्धा हुने बताइएको छ ।

४० वर्ष उमेर समूहतर्फको विजेताले २ लाख र दोस्रो टोलीले १ लाख रुपैयाँसहित ट्रफी प्राप्त गर्नेछन्।
विधागततर्फ सर्वोकृष्ट खेलाडीले १५ हजार, उत्कष्ट गोलकिपर, डिफेन्डर, मिडफिल्डर, फरवार्ड र प्रशिक्षकले समान ५ हजार रुपैयाँ प्राप्त गर्नेछन् ।

यस्तै ५० वर्ष उमेर समूहतर्फको  विजेताले १ लाख र दोस्रो टोलीले ५० हजार रुपैयाँसहित ट्रफी प्राप्त गर्नेछन् । ६० वर्ष उमेर समूहतर्फको विजेताले ५० हजार र दोस्रोले ३० हजार रुपैयाँ सहित ट्रफी प्राप्त गर्नेछन् । 

प्रतियोगितामा भारतको देहरादुन, काठमाडौं, ललितपुर, चितवन, सिरहा, हेटौंडा, सर्लाही, बुटवल,सिमरा,कैलाली, झापा, बिर्तामोड र पोखराका स्थानीय टिमको सहभागिता रहेको छ ।

बगर भाइखलकले फुटबल खेल विकासमा विशेष योगदान दिने खेलाडीहरुलाई सम्मान गर्दै आएको बताउँदै यस वष पूर्व खेलाडी रमेश भट्टचनलाई सम्मान गर्ने जनाएको छ ।

प्रतियोगिताको मुख्य प्रायोजकमा चिरायु नेशनल अस्पताल र सहप्रायोजकमा बगर भाइ खलक युके रहेको छ ।