सनिशको गोलसँगै मच्छिन्द्र सेमिफाइनलमा

काठमाडौं (हाम्रो खेलकुद) – डिफेन्डर सनिश श्रेष्ठले इन्ज्युरी समयको अन्तिम क्षणमा पूर्व क्लब एपिएफविरुद्ध गोल गर्दा मच्छिन्द्रले सभापति कप २०८१ को सेमिफाइनलमा स्थान पक्का गरेको छ ।

दशरथ रंगशालामा शुक्रबार साँझ भएको खेलमा मच्छिन्द्रले एपिएफमाथि १-० को जित दर्ता गर्यो । निकै प्रतिस्पर्धात्मक खेलमा सनिशले इन्ज्युरी समयको आठौँ मिनेटमा गोल गरेका थिए । खेल गोलरहित रहेपछि टाइब्रेकरतर्फ अघि बढेको समयमा अन्तिम मिनेटमा प्राप्त थ्रो इन बाट बनेको मुभमा सनिशले गोल गरे । उनले फार पोस्टमा अनमार्क रहेको अवस्थामा आएको क्रसलाई निकै कठिन एंगलबाट गोलमा परिणत गरेका थिए ।

प्रतियोगिता अन्तर्गत शनिबार तेस्रो क्वाटरफाइनलमा आयोजक लोकतान्त्रिक खेलकुदको बागमती प्रदेश कमिटीको टोलीले नेपाल पुलिस क्लबको सामना गर्नेछ । चौथो क्वाटरफाइनलमा भने न्यू रोड टिम (एनआरटि) र फ्रेन्ड्स क्लब खेल्नेछन् ।

मच्छिन्द्रले अब सोमबार सेमिफाइनलमा पहिलो दिनको विजेता संकटासँग खेल्नेछ ।