काठमाडौं (हाम्रो खेलकुद)- एन्फा महिला लिगको अन्तिम चरणको अर्थहिन खेलमा सुष्मा तामाङको ह्याट्रिकमा वालिङ नगरपालिकाले पहिलो जित निकालेको छ।

वालिङले प्ले अफमा पुगिसकेको बागमती युथ क्लबलाई ३-१ गोल अन्तरले हरायो। यो जित वालिङको लागि सान्त्वना जित बन्यो।

एन्फा कम्प्लेक्समा आज भएको खेलमा बागमती विरुद्ध मैदानमा उत्रिएको वालिङको प्ले अफमा पुने संभावना समाप्त भैसकेको थियो। वालिङ विरूद्ध खेलमा पहिले अग्रता बागमतीले बनायो।

४३ औं मिनेटमा अस्मिता खवासको लामो पासमा मन्दिराको प्रहारलाई गोल किपरले रोकेपनि रिबाउन्डमा साहरा लिम्बुले गोल गरिन्। पहिलो हाफमा बागमती १-० ले अगाडि बढ्यो।

तर दोस्रो हाफमा वालिङले सानदार प्रदर्शन गर्यो। ५६औं मिनेटमा मिना बोहराको असिस्टमा सुष्माले गोल गर्दै खेललाई एक-एकको बराबरीमा पुर्याइन्।

६९ औं मिनेटमा वालिङले दोस्रो गोल गर्यो। सुप्रिया मियाको कर्नरमा सुष्माको हेडरले सही दिशा लियो।

बागमती विरुद्ध ८५ औं मिनेटमा सुष्माले ह्याट्रिक पुरा गरिन्। सुप्रियाको प्रहारलाई गोल किपरले बचाइन्। रिबाउन्डमा सुष्माको प्रहार पनि रोकिन्। तर सुष्माले दोस्रो प्रयासमा गोल गर्दे ह्याट्रिक पूरा गरिन् ।

सँगै वालिङले आठौं तथा अन्तिम खेलमा ३ जित निकाल्यो। यही एक जित र तीन अंकमा उसले अन्तिम चरणको लिग सकायो। ८ खेलबाट ४ अंक बनाएको बागमती यसअघि नै प्ले अफमा पुगेको बागमतीसँग ४ अंक रहेको छ।