काठमाडौं (हाम्रो खेलकुद)- एन्फा महिला लिगको अन्तिम चरणको सातौं खेलमा पनि एपिएफ फुटबल क्लबले विजय यात्रालाई जारी राखेको छ।

सातदोबाटोस्थित एन्फा कम्प्लेक्सको मैदानमा सोमवार भएको खेलमा शीर्ष टोली एपिएफले अर्को विभागीय टोली नेपाल पुलिस क्लबलाई‌ २-० ले हराएको छ।

एपिएफका लागि रश्मि‌कुमारी घिसिङ र अनिता केसीले गोल गरे। दुवै गोल हेडमा भएको थियो। दुवै गोलमा प्लेयर अफ दि म्याच सविता राना मगरको क्रस थियो।

रश्मिले १७ औं मिनेटमा गोल गरेकी थिइन्। दोस्रो हाफमा मैदान प्रवेश गरेकी अनिताले ६४ औं मिनेटमा गोल गरेकी थिइन्। उनी गोल गर्नु केहि मिनेटअघि मात्र मैदान प्रवेश गरेकी थिइन्।

अन्तिम चरणमा पुलिस दुवै पटक एपिएफसँग पराजित भएको छ। यसअघिको‌ खेलमा पुलिस ६-१ ले पराजित भएको थियो। यि दुई टोलीबिच दोस्रो चरणमा भएको खेल भने गोलरहित बराबरीमा टुंगिएको थियो।

पहिलो क्वालिफायरमा पुगिसकेको एपिएफको २१ अंक छ। प्ले अफमा पुगिसकेको तेस्रो स्थानको पुलिसको ११ अंक छ।

लिगमा मंगलवार बागमती युथ क्लब र वालिङ नगरपालिकाबिच प्रतिस्पर्धा हुनेछ । प्ले अफ अघिको अन्तिम खेल एपिएफ र १६ अंकसहित दोस्रो स्थानमा रहेको त्रिभुवन आर्मी फुटबल क्लब बिच बुधवार हुनेछ।