काठमाडौं (हाम्रो खेलकुद)- चन्द्रा भण्डारी एक्लैले ५ गोल गर्दा त्रिभुवन आर्मी फुटबल क्लबले वालिङ नगरपालिकालाई आइतवार ६-१ गोल अन्तरले हराउँदै एन्फा महिला लिगको अन्तिम चरणको क्वालिफायर १ मा स्थान बनाएको छ।

हारमा वालिङ लिगबाट बाहिरिएको छ। आजको यो नतिजामा प्ले अफको समीकरण समेत पूरा भएको छ। क्वालिफायर १ मा आर्मी र एपिएफ फुटबल क्लबबीच प्रतिस्पर्धा हुनेछ।

नेपाल पुलिस क्लब र बागमती युथ क्लबले इलिमिमेटरमा प्रतिस्पर्धा गर्ने समीकरण बनेको छ।

आज एन्फा कम्प्लेक्समा भएको खेलमा आर्मीले आधा दर्जन गोल गर्ने क्रममा खेलको १५ औं मिनेटमा चन्द्राले गोलको खाता खोलिन्।

तर यो अग्रता १८ औं मिनेटमा तोडियो। मिना देउवाले डिफेन्डरलाई बिट गर्दै उत्कृष्ट गोल गरिन्। तर २४ औं मिनेटमा चन्द्राको व्यक्तिगत दोस्रो गोलमा पहिलो हाफमा आर्मीले २-१ को अग्रता बनायो।

दोस्रो हाफमा चन्द्राले प्रभावशाली प्रदर्शन गरिन्। ६३ औं मिनेटमा उनले ह्याट्रिकको सफलता प्राप्त गरिन्। यसपछि ६८ औं र ७३ औं मिनेटमा थप २ गोल आफ्नो नाममा लेखाउन सफल रहिन्। उनको व्यक्तिगत ५ गोलमा आर्मीले वालिङलाई ६-१ को हार चखायो।

आर्मीले सात खेलबाट १६ अंक बनाएको छ। वालिङ अंकबिहिन बन्दै बाहिरियो। अन्तिम चरणको लिगमा अब एपिएफ र आर्मी तथा बागमती र वालिङबीचको खेल भने बाँकी नै छ।