चितगोङ (हाम्रो खेलकुद) – पहिलो खेल जितिसकेको लक्ष्मी हुन्डाई मनाङ मस्र्याङ्दी क्लबले शेख कमल अन्तर्राष्ट्रिय क्लब कप–२०१७ को समूह चरणको दोस्रो खेलमा बुधबार अफगानिस्तानी क्लब शाहिन आस्मयीको सामना गर्दैछ ।

तस्बिरहरु: दिल तामाङ (एन.एस.जे.एफ)

आइतबार भएको समूह चरणको पहिलो खेलमा निकालेको जितले हौसिएको मनाङ बुधबार शाहिन आस्मायीलाई हराउँदै सेमिफाइनल यात्रा सहज बनोन लक्ष्यका साथ उत्रनेछ । यी दुईबीचको खेल नेपाली समय अनुसार दिउसो ३ः४५ बजेपछि चितगोङस्थित मोहम्मद अजिज रंगशालामा हुनेछ ।

मनाङलेले पहिलो खेलमा मोहमडन स्पोर्टिङ क्लबलाई २–० ले पराजित गर्दा ओलावाले ओलाडिपो अफिज र विशाल राईले गोल गरेका थिए । शाहिन आस्मयी भने पहिलो खेलमा आयोजक चितगोङ अवहनी लिमिटेडसँग ३–१ को हार बेहोरेको थियो । बुधबार समुह ‘बी’ को दोस्रो खेलमा आयोजक चितगोङ अवहनी लिमिटेड र मोहमोदेन स्पोर्टिङ क्लबबीच प्रतिस्पर्धा हुनेछ । मनाङले लगातार दोस्रो जित निकाले एक खेल अगावै सेमिफाइनलमा स्थान बनाउनेछ । खेल बराबरीमा रोकिए वा पराजित भए सेमिफाइनल प्रवेशका लागि दोस्रो खेलको नतिजा कुर्नुपर्ने हुन्छ ।

मनाङका मुख्य प्रशिक्षक छिरिङ लोप्साङ गुरुङले अफगानिस्तानको शाहिन आस्मयीविरुद्धको खेल प्रतिस्पर्धात्मक हुने बताएका छन् । ‘पहिलो खेलमा पराजित भएको आस्मायी अर्काे चरण पुग्नका लागि ‘गर या मर’ को अवस्थामा छ । हामीलाई पनि सेमिफाइनल पुग्नका लागि जित्नै पर्ने दबाव छ ’ प्रशिक्षक लोप्साङले भने, ‘आस्मायीलाई पराजित गर्दै सेमिफाइनल यात्रा सहज बनाउने हाम्रो लक्ष्य छ ।’
यस्तै प्रशिक्षक लोप्साङले आस्मायीविरुद्धको खेलमा केही खेलाडी परिवर्तन हुने संकेत गरे । मोहमडनविरुद्धको खेलमा दोस्रो हाफमा ओगाविमिरो ओलासेमि साम्सोनको स्थानमा मैदान छिरेका विक्रम लामा बुधबारको खेलमा पहिलो रोजाइमा पर्ने पक्का छ । मिडफिल्डमा निराजन मल्ल र डोना थापाले खेल्ने सम्भावना बढी छ । गोलरक्षक र डिफेन्स लाइनमा कुनै पनि खेलाडी परिवर्तन नहुने र खेल रणनीतिमा परिवर्तन हुने प्रशिक्षक गुरुङले बताए । विपक्षी टिमको मिडफिल्ड र स्ट्राइकिङ पक्ष बलियो रहेको तर, डिफेन्समा रहेको कमजोरीलाई चिर्ने प्रशिक्षक लोप्साङले बताए । यस्तै कप्तान अनिल गुरुङले दोस्रो खेलको लागि टिम तयार रहेको बताए । ‘पहिलो खेल जितेको हौसलाका साथै प्रशिक्षण पनि राम्रै भएको छ, आशा छ बुधबार सकरात्मक नतिजा निस्कनेछ ’ उनले भने, ‘दोस्रो खेल पनि जित्दै सेमिफाइनल यात्रालाई सहज बनाउनेछौं ।’

आइतबार समूह चरणको पहिलो खेल खेलेको मनाङले सोमबार सामान्य प्रशिक्षण गरेको थियो भने मंगलबार पूर्ण प्रशिक्षण गरेको थियो । नेपालले समूह चरणको अन्तिम खेलमा शुक्रबार आयोजक चितगोङ अवहनी लिमिटेडसँग प्रतिस्पर्धा गर्दैछ । समूह विजेता र उपविजेता सेमिफाइनलमा प्रवेश गर्नेछ । प्रतियोगिता मार्च २ गतेसम्म चल्नेछ ।

नेपाली राष्ट्रिय टिमका गोलरक्षक सम्मिलित माल्दिभ्सको टीसी स्पोर्टस् समूह ‘ए’ बाट एक खेल अगावै सेमिफाइनलमा प्रवेश गरिसकेको छ । सोमबार भएको समूह चरणको दोस्रो खेलमा किर्गिस्तानको एफसी आल्गालाई २–१ ले पराजित गरेपछि टिसी स्पोर्टस् एक खेल अगावै सेमिफाइनलमा पुग्न सफल भएको हो । टीसी स्पोर्टस्ले समूह विजेता बन्नका लागि बिहिबार दक्षिण कोरियाको पोइचेन सिटीजन एफसीसँग प्रतिस्पर्धा गर्नेछ ।

मनाङ सम्भावित पहिलो रोजाइ

दिनेश थापामगर (गोलरक्षक), विराज महर्जन, कमल श्रेष्ठ, देवेन्द्र तामाङ, अदमा बो सिसिको (डिफेन्डर), विक्रम लामा, रोहित चन्द, विशाल राई, सुजल श्रेष्ठ, अनिल गुरुङ (मिडफिल्ड) र ओलावाले ओलाडिपो अफिज (फरवार्ड)