काठमाडौं (हाम्रो खेलकुद)- एन्फा महिला लिगको अन्तिम चरण अन्तर्गत आज त्रिभुवन आर्मी फुटबल क्लबले बागमती युथ क्लबलाई ३-० ले हराएको छ।

आर्मीको जितमा सपना लामा, पुनम जर्घा मगर र चन्द्रा भण्डारीले गोल गरे। विमला चौधरीले दुई असिस्ट गरिन् ।

एन्फा कम्प्लेक्समा भएको खेलको सुरुवातमा नै आर्मीले अग्रता बनायो। छैटौं मिनेटमा विमलाको सटिक क्रसमा सपनाको क्लोज रेन्ज हेडरमा गोल गरिन् ।

२२औं मिनेटमा आर्मीले अग्रता दोब्बर पार्यो। चन्द्राको ब्याक पासमा पुनमले बक्स भित्रबाट गोल गरिन्। पहिलो हाफमा आर्मी २-० ले अगाडि बढ्यो।

बागमतीलाई दबाबमा राख्न सफल आर्मीले इन्ज्युरी समयमा तेस्रो गोल गर्यो। विमलाको क्रसमा चन्द्राले गोल गरिन्।
जारी लिगमा बागमती आर्मीसँग हारेको यो तेस्रो पटक हो। दोस्रो चरणमा ३-० र अन्तिम चरणको पहिलो लेगमा २-० ले बागमती हारेको थियो।

जारी लिगमा आर्मीको यो तेस्रो जित हो। उसले १० अंक बनाएको छ। यो जितमा आर्मी लिगको दोस्रो स्थानमा उक्लिएको छ। एक खेल कम खेलेको एपिएफ १२ अंकसहित शीर्ष स्थानमा छ भने नेपाल पुलिस क्लबको ७ अंक छ।

यसअघि आर्मीले वालिङ नगरपालिका र बामतीलाई हराउँदा पुलिससँग बराबरीमा रोकिएको थियो। आर्मी एपिएफसँग हारेको थियो।

बागमतीको यो चौथो हार हो। पाँच खेल खेलेको बागमतीसँग तीन अंक रहेको छ। उसले वालिङलाई हराएको थियो। भोलि वालिङ र पुलिसबीच खेल हुनेछ।