काठमाडौं (हाम्रो खेलकुद)- एन्फा महिला लिगको अन्तिम चरणको आजको खेलमा आज वालिङ नगरपालिका र बागमती युथ क्लबले प्रतिस्पर्धा गर्देछन्।

एन्फा कम्प्लेक्समा यी दुई टोलीले‌ एकअर्काको सामना गर्दा अंकको खाता खोल्ने दाउमा रहनेछन्। दुवैले यसअघि तीन खेल खेलिसकेका छन्। तीन खेलमा दुवै टोलीले तीन विभागीय टिमसँग हारेका थिए।

बागमतीले नेपाल पुलिस क्लब र त्रिभुवन आर्मी क्लबसँग २-० को हार बेहोर्दा एपिएफ फुटबल क्लबसँग ५-१ ले पराजित भएको थियो। ३ खेलमा टोलीले ९ गोल खाँदा १ गोल गरेको छ।

वालिङले पनि ३ खेल नै हारेको छ। तर उसले ठूलो अन्तरको हारको सामना गरिरहेको छ। आर्मीसँग एक दर्जन गोल खाँदा एपिएसँग ९-० ले हारेको थियो।  पुलिससँग  ५-० ले हारेको थियो। यसरी ३ खेलमा वालिङले २६ गोल बेहोरिसकेको छ। यो क्रममा एक गोल समेत वालिङले गर्न सकेको छैन्।

अन्तिम चरणमा सहभागी ५ टोलीको सहभागिता रहँदा यी दुई टिम निकै कमजोर देखिएका छन्। प्ले अफ प्रवेशका लागि दुवै टिमलाई आजको जित र ३ अंक महत्वपूर्ण हुनेछ।

प्ले अफमा ४ टिमले स्थान बनाउनेछन्। जारी लिगमा लगातार ३ जित सहित एपिएफ शीर्षस्थानमा रहँदा दोस्रो आर्मी र तेस्रो पुलिसको‌ समान ७ अंक छ। आजको खेल दिउँसो ३ बजे सुरु हुनेछ। खेल हाम्रो खेलकुदको युट्युब च्यानलबाट प्रत्यक्ष प्रसारण हुनेछ।