उद्घाटन खेलमा हिमचुली एकेडेमीको जित

काठमाडौं (हाम्रो खेलकुद)– दोस्रो मध्यपुर थिमि नगरपालिका कप विद्यालय स्तरीय फुटबल प्रतियोगिताको उद्घाटन खेलमा हिमचुली एकेडेमी विजयी भएको छ । थिमी मैदानमा बिहीबार भएको खेलमा हिमचुलीले ग्लाडस्टोट एकेडेमीलाई टाइब्रेकरमा ३–२ ले हराएको थियो ।

७० मिनेटको खेल १–१ को बराबरीमा टुंगिएपछि खेलको निर्णय टाइब्रेकरमा भएको थियो । मध्यपुर थिमी नगरपालिकाको प्रायोजन र मध्यपुर युथ एसोसिएसनको आयोजनामा भएको प्रतियोगितामा थिमी नगरपालिका भित्रका २० विद्यालयको सहभागिता रहेको छ । थिमी नगरपालिकाका कार्यकारी अधिकृत कमलमणी ज्ञवालीले प्रतियोगिताको उद्घाटन गरेका थिए ।

१० दिने प्रतियोगिताको विजेताले ३० र तेस्रो हुने टोलीले १५ हजार रुपैयाँ प्राप्त गर्नेछन् । एसोसिएसनका अध्यक्ष एवंम् राष्ट्रिय टोलीका पूर्व कप्तान उपेन्द्रमान सिंहले भविष्यमा नगपालिका र देशव्यापी गरि दुई वटा प्रतियोगिता बार्षिक रुपमा आयोजना गर्ने लक्ष्य रहेको बताएका छन् ।