एजेन्सी – टोटेनहम हटस्परले इंग्लिस प्रिमियर लिगमा साविक विजेता म्यानचेस्टर सिटीमाथि सानदार जित दर्ता गरेको छ । टोटेनहमले सिटीलाई उसकै घरेलु मैदानमा ४–० को लज्जास्पद हार चखाएको हो ।

इतिहाद स्टेडियममा शनिबार राति भएको खेलमा टोटेनहमलाई जिताउन जेम्स म्याडिसनले दुई तथा पेड्रो पोरो र ब्रेनन जोन्सनले समान एक गोल गरे । पहिलो र दोस्रो हाफमा समान दुई गोल भएको थियो ।

खेलको २०औं मिनेटमा जेम्स म्याडिसनले गोल गर्दै टोटेनहमलाई अगाडि बढाए । उनले डिजान कुलुसेभ्स्कीको पासलाई सदुपयोग गरे । २०औं मिनेटमा म्याडिसनले कप्तान ह्युङ मिन सनको पासमा व्यक्तिगत र टोलीका लागि दोस्रो गोल गर्दा टोटेनहम पहिलो हाफमा २–० ले अघि बढ्यो ।

५२औं मिनेटमा पेड्रो पोरोले गोल गरेपछि सिटी खेलमा ३–० ले पछि पर्यो । टोटेनहम यतिमै रोकिएन । इन्ज्युरी समयको थप गरिएको तेस्रो मिनेटमा परिवर्तित खेलाडी ब्रेननले गोल गर्दै सिटीलाई ४–० को लज्जास्पद हार चखाए । ६३औं मिनेटमा सनको स्थानमा मैदान छिरेका ब्रेननले टिमो वेर्नरको पासलाई सदुपयोग गरेका थिए ।

सिटीको यो लगातार पाँचौं हार हो । सन् २००६ पछि सिटी लगातार पाँच खेलमा पराजित भएको यो पहिलो पटक हो । २७ अक्टोवरमा साउथह्याम्टनलाई १–० ले हराएयत सिटीले लगातार पाँच खेलमा हार बेहोरेको छ ।

यस्तै घरेलु मैदान इतिहादमा पेप ग्वार्डिओलाको सिटीको ५२ खेलको अपराजित यात्रा पनि टुंगिएको छ । ३१ अक्टोवरमा इएफएल कपमा टोटेनहमसँगै २–१ ले पराजित भएको सिटी त्यसपछि बर्नमाउथ, स्पोर्टिङ सिपी र ब्राइटनसँग पराजित भएको थियो ।

यस जितसँगै टोटेनहम १२ खेलबाट १९ अंक जोडेर छैटौं स्थानम उक्लिएको छ । समान १९ अंक नै रहेपनि नटिङहम फरेस्ट र एस्टन भिल्ला गोल अन्तरमा पछि छ ।

पछिल्लो पाँच खेलमा पराजित भएको सिटी १२ खेलबाट २३ अंक जोडेर दोस्रो स्थानमा यथावत छ । सिटी शीर्षस्थानको लिभरपुलसँग ५ अंकले पछि छ । लिभरपुलले अझै एक खेल कम खेलेको छ ।

शनिबार नै चेल्सीले लेस्टर सिटीलाई २–१, आर्सनलले नटिङघम फरेस्टलाई ३–०, ब्राइटनले बर्नमाउथलाई २–१ र वल्भ्सले फुलहमलाई ४–१ ले हराउँदा एस्टन भिल्ला र क्रिस्टल प्यालेसले २–२ गोलको तथा एभरटन र ब्रेन्टफोर्डले गोलरहित बराबरी खेल्दै अंक बाँडे ।