उदयपुर (हाम्रो खेलकुद) – रुपन्देही ११ ले रममप चौथो उदयपुर गोल्ड कप फुटबल प्रतियोगिताको उपाधि जितेको छ । मोरङ फुटबल क्लबलाई टाइब्रकेरमा ४–३ ले हराउँदै रुपन्देहीले उपाधि जितेको हो ।

निर्धारित समय गोलरहित बराबरीमा टुंगिएपछि टाइब्रेकरमा रुपन्देहीले बाजी मारेको हो । उपाधिसहित रुपन्देहीले २ लाख रुपैयाँ तथा मोरङले १ लाख रुपैयाँ प्राप्त गरे । टाइब्रेकरमा रुपन्देहीका लागि सुबास मगर, बुद्ध चेम्जोङ, उत्तम गुरुङ र दीलिप क्षत्रीले गोल गरे । दीलिपको गोल नै निर्णायक बन्न पुगेको थियो ।

त्यस्तै मोरङका निरज बस्नेत, बुद्धिमान राई र विकास खवासले मात्र गोल गरे । विदुर रिजाल र अनस मगरले गोल गर्न सकेनन् । रुपन्देहीको कालु थापाले पेनाल्टीमा गोल गर्न सकेनन् । रुपन्देहीका पिटर फाइनलको म्यान अफ दी म्याच घोषित भए ।

मोरङका निरज बस्नेत सर्वोत्कृष्ट खेलाडी घोषित भए । रुपन्देहीकै दीलिप उत्कृष्ठ गोलकिपर, उदयपुरका रामु थापा उदयमान खेलाडी घोषित भए । हिमालयन शेर्पाका विश्वास श्रेष्ठ, रुपन्देहीका दिपक राई र संकटाका राजु पौडेल उच्च गोलकर्ता बने । उनीहरुले समान २ गोल गरेका थिए । अखिल नेपाल फुटबल संघका अध्यक्ष नरेन्द्र श्रेष्ठ, प्रमूख जिल्ला अधिकारी कालिप्रसाद पराजुली, प्रहरी प्रमूख नरबहादुर केसी लगायतले विजेता उपविजेता टोलीका खेलाडी पुरस्कृत गरे् । फागुन २७ गतेदेखि सन्चालन भएको गोल्डकपमा ८ टोलीको सहभागिता थियो ।