सुशील पन्त क्षेत्री,चितवन

नेपाली राष्ट्रिय महिला फुटबल टोलीकी डिफेन्डर पूजा राना मगर चितवनमा सम्मानित भएकी छन् । युनिक क्लब बसेनीले आज पूजालाई सम्मान गरेको हो ।

क्लबले भरतपुर ११ कैलाश टोलस्थित मैदानमा आयोजित सम्मान तथा चियापान कार्यक्रममार्फत पूजालाई १० हजार रुपैयाँसहित सम्मान पत्रले सम्मान गरेको हो ।

नेपाली महिला फुटबलमा पुराएको योगदानको उच्च मुल्याङ्कन गर्दै पूजालाई सम्मान गरिएको क्लबका अध्यक्ष दीपक गुरुङले जानकारी दिए ।

यसै महिना काठमाडौंमा सम्पन्न साफ महिला च्याम्पियनसिपमा नेपाललाई फाइनलमा सम्म पुराउन पूजाले महत्त्वपूर्ण योगदान गरेको गुरुङले बताए । उनले आगामी दिनमा नेपाली महिला फुटबललाई थप उचाईमा पुराउन पूजाको महत्त्वपूर्ण भूमिका रहने समेत विश्वास व्यक्त गरे ।

पूजाले साफमा खेलाडीहरुले निकै मेहेनत गरेको बताइन् । आगामी दिनमा थप उत्कृष्ट प्रदर्शन गर्दै सम्पूर्ण नेपालीको मुहारमा खुशी ल्याउन सक्दो प्रयास गर्ने जनाउँदै उनले यो सम्मानले आफ्नो खेल जीवनमा थप हौसला प्रदान गर्ने बताईन् ।

सन् २०१९ मा राष्ट्रिय महिला फुटबल टोलीबाटडेब्यु गरेकी पूजा त्यसयता नियमित सदस्यको रहँदै आएकी छन् । पूजाले नेपाल पुलिस क्लबबाट व्यवसायिक फुटबल खेल्दै आएकी छन् ।