दिल तामाङ, सिड्नी

कप्तान सुशान्त कुँवरको ह्याट्रिक सहयोगमा सेन्ट जर्ज नेप्लिज क्लबले २५औं संंस्करणको गोर्खा नेप्लिज कम्युनिटी (जिएनसी) फुटबल शिल्डको उपाधि जितेको छ ।

सुरुवाती अग्रता लिएपनि १–३ ले पछि परेको स्थिति उल्ट्याएर सेन्ट जर्जले साविकको विजेता फेवा एफसीमाथि ४–३ को रोमाञ्चक जित निकाल्दै उपाधि जित्न सफल भएको हो ।

अस्ट्रेलियाको सिड्नीस्थित नोरफोर्ड पार्क चेस्टर हिलमा आइतबार भएको रोमाञ्चक र प्रतिस्पर्धात्मक फाइनलमा सेन्ट जर्जका कप्तान सुशान्त कुँवरले ह्याट्रिक पुरा गर्दा डार्विन श्रेष्ठले एक गोल गरे । फेवाका रविशंकर पासवान, हेमन्त थापा मगर र बिमलले गोल फर्काए ।

खेलमा सुरुवाती सेन्ट जर्जले १४औं मिनेटमा लिन सफल भयो । कप्तान सुशान्तको पासमा डार्विन श्रेष्ठले गोल गर्दै सेन्ट जर्जलाई १–० को अग्रता दिलाए । तर, सेन्ट जर्जको अग्रता लामो समय टिकेन ।

१८औं मिनेटमा फेवाका कप्तानी सम्हालिरहेका हेमन्त थापा मगरले पेनाल्टीमा गोल गर्दै खेललाई १–१ गोलको बराबरीमा ल्याए । उत्तम गुरुङले फउल गरेपछि रेफ्री सपन बस्नेतले फेवालाई पेनाल्टी प्रदान गर्दा हेमन्त चुकेनन् ।

२६औं मिनेटमा रविले गोल गर्दै फेवालाई खेलमा २–१ को अग्रता दिलाए । उनले वन भर्सेस वानको स्थितिमा आफ्नो गतिलाई बढाएर एक डिफेन्डर र गोलरक्षकलाई बिट गर्दै डि बक्स नजिकबाट गरेको प्रयासले विस्तारै जाली चुम्न पुग्यो ।

३७औंं मिनेटमा बिमलले गोल गरेपछि फेवाले पहिलो हाफमा ३–१ को आरामदायी अग्रता कायम गर्न सफल भयो । रवि पासवानको प्रहार विपक्षी डिफेन्डरलाई लाग्दै आएको बललाई बिमलले सहजै जाली चुमायो ।

४६औं मिनेटमा कप्तान सुशान कुँवरले गोल गर्दै खेललाई २–३ को स्थितिमा ल्याए । कर्नरबाट आएको बललाई रामकुमार कुमालले गरेको हेडर क्लियर हुन नसक्दा सुशानले वन टचमा सहज फिनिस गर्दै सेन्ट जर्जलाई खेलमा फर्काउने संकेत दिए ।

५६औं मिनेटमा कप्तान सुसान कुँवरले गोल गर्दै व्यक्तिगत दोस्रो र टोलीका लागि तेस्रो गोल गर्दै खेललाई ३–३ गोलको बराबरीमा ल्याए । रामकुमार कुमालको क्रसमा अनमार्क रहेका सुशानले हेडरमार्फत सहजै गोल गरे ।

६४औं मिनेटमा कप्तान सुशान्त कुँवरले ह्याट्रिक पुरा गरेपछि सेन्ट जर्जले खेलमा ४–३ को अग्रता लिन सफल भयो । त्यसपछि थप गोल निस्कन नसक्दा सेन्ट जर्जले खेल आफ्नो पक्षमा पार्दै उपाधि जित्न सफल भयो ।

उपाधिसँगै सेन्ट जर्जले नगदसँगै शिल्ड, मेडल र प्रमाणपत्र प्राप्त गरेकाे छ । दाेस्राे भएकाे फेवाले मेडल र प्रमाणपत्र प्राप्त गरेकाे छ ।

सेन्ट जर्ज करिव ९ महिना चल्ने प्रिमियर लिग २०२३–२४ को समेत च्याम्पियन हो । सेन्ट जर्जसँगै फेवा र बेनी एफसीको पनि समान ११ खेलबाट २८ अंक रहेपनि गोल अन्तरमा सेन्ट जर्ज लिग च्याम्पियन बन्दा फेवा दोस्रो र बेनी तेस्रो स्थानमा रहन पुगेको थियो ।

गत सिजन जिएनसी प्रिमियर लिग र शिल्डको उपाधि फेवाले जितेको थियो । यसवर्ष फेवाले दोस्रोमा चित्त बुझाएको छ ।
जिएनसी प्रिमियर लिगमा शीर्ष चार टोलीले जिएनसी शिल्ड खेल्ने प्रावधान छ । शीर्षस्थानमा रहेको सेन्ट जर्जले दि राइजिङ गोर्खाज फुटबल क्लबलाई तथा फेवाले बेनी एफसीलाई पराजित गरी फाइनलमा भेट पक्का गरेको थियो ।

२५औं संंस्करणको जिएनसी शिल्डको समापनसँगै २६औं संस्करणको जिएनसी प्रिमियर लिग शुरु हुनेछ । नयाँ सिजन यसै नोभेम्वरको अन्त्यतिरबाट शुरु हुँदैछ । जिएनसी लिगमा मेजर, माइनर र भेट्रान गरी तीन लिग हुनेछ ।

फेवाका बिमल राना लिगको सर्वाेत्कृष्ट खेलाडी चुनिए । सेन्ट जर्जका सुशान्त कुँवर र रुप बहादुर लामा सर्वाधिक गोलकर्ता चुनिए । उनीहरुले लिगमा समान १६ गोल गरेका थिए । यस्तै सेन्ट जर्जकै मिलन गिरी उत्कृष्ट गोलरक्षक चुनिए ।

३५ वर्षमाथि म्याकार्थर नेप्लिज एफसीले पारा पार्क एफसीलाई टाइब्रेकरमा ३–२ ले पराजत गर्दै उपाधि जितेको छ । जिएनसी लिगेसीतर्फ म्यारिकभिलले बरुडलाई ३–१ ले पराजित गर्दै उपाधि जितेको छ ।