काठमाडौं (हाम्रो खेलकुद) – साफ महिला च्याम्पियनसिप २०२४ अन्तर्गत पहिलो सेमिफाइनलको पहिलो हाफमा बंगलादेशले भुटानविरुद्ध ५ गोल गरेको छ ।

बंगलादेश पहिलो हाफमा ५-१ को अग्रता लिन सफल भयो । बंगलादेशका लागि कप्तान सविना खातुन र तोहुरा खातुनले २-२ तथा ऋतु पोर्ना चक्माले १ गोल गरे । भुटानले डेकी ल्हाजोमले १ गोल फर्काइन् ।

खेलको सातौं मिनेटमा नै बंगलादेशले अग्रता लियो । ऋतुले पेनाल्टी क्षेत्र बाहिरबाट शक्तिशाली लिएको प्रहारमा गोलरक्षक संगिता मोंगर बलसम्म पुग्न सकिनन् ।

११ औं मिनेटमा ऋतुकै क्रसमा सागोरिकाको हेडरलाई भुटानकी दोर्जी इडोनले गोललाइनबाट हेडर क्लिअरेन्स गरिन् ।

१५ औं मिनेटमा तोहुराले पेनाल्टी क्षेत्र बाहिरबाट गरेको प्रहारमा गोलरक्षक मोंगर सहजै बिट भइन् । २५ औं मिनेटमा सविनाले पेनाल्टी क्षेत्र भित्रबाट गरेको प्रहार पोस्टमा लागेर फर्कियो । लगत्तै मोनिका चक्माको पासमा सविनाले फिनिस गर्दै बंगलादेशलाई ३-० ले अघि बढाइन् ।

३६ ओं मिनेटमा तोहुराले व्यक्तिगत दोस्रो गोल गरिन् । पेनाल्टी क्षेत्र बाहिरबाट उनको फितलो प्रहारमा गोलरक्षक संगिता बिट भइन् । लगत्तै सविनाले पनि व्यक्तिगत दोस्रो गोल गरिन् । गोलरक्षक रुप्ना चक्माको गोलकिकमा दुवै सेन्टर डिफेन्डर झुक्किन पुग्दा सविनाले एक्लै बल बढाएर गोलरक्षक समेत छलाउँदै गोल गरिन् ।

४१ औं मिनेटमा भुटानका लागि डेकी ल्हाजोमले गोल फर्काइन् । छिरिङ ल्हादेनको क्रसमा डेकीको प्रहार गोलरक्षक रुपनालाई लाग्दै गोल भयो ।

प्रतियोगिता अन्तर्गत दोस्रो सेमिफाइनल साँझ ६:३० बजे नेपाल र भारतबीच हुनेछ ।