काठमाडौं (हाम्रो खेलकुद)- महिला साफ च्याम्पियनसिपको सर्वाधिक सफल ५ पटकको विजेता भारत र साविक विजेता बंगलादेश समूह चरणमा आज खेल्नेछन् ।

त्रिपुरेश्वरस्थित दशरथ रंगशालामा खेल ५:३० बजे सुरु हुनेछ । पहिलो खेलमा पाकिस्तानलाई ५-२ ले हराएको भारत सेमिफाइनल पुगिसकेको छ ।

समूह ‘ए’ बाट सेमिफाइनल पुग्ने दोस्रो टोलीको तय आजको खेलको नतिजाबाट हुनेछ। भारतको ३ तथा बंगलादेश र पाकिस्तानको समान १ अंक छ ।

बंगालादेशले पाकिस्तानसँग १-१ को बराबरी खेलेका कारण भारतसँगको खेलमा दबाबमा हुनेछ। बंगलादेश त्यहि टोली हो जसले अघिल्लो संस्करणको समूह चरणमा भारतलाई ३-० ले र पहिलो पटक च्याम्पियन बन्ने क्रममा फाइनलमा नेपाललाई ३-१ ले हराउने टोली हो।

यसपटक ३-० ले भारतसँग पराजित भएमा भने बंगलादेश समूह चरणबाट बाहिरिनेछ । खेल बराबरीमा टुंगिएमा उपविजेताका रुपमा बंगलादेश अन्तिम चारमा पुग्नेछ र पाकिस्तान बाहिरिने छ। भारतमाथि जित दर्ता गर्दै समूह चरणको विजेता बन्ने सम्भावना पनि बंगलादेशसँग छ।

अर्को समूहबाट नेपाल र भुटान सेमिफाइनल पुग्ने सम्भावना छ। नेपाल र भुटानको समान ४ अंक छ भने श्रीलंकाको ३ र माल्दिभ्स अंक विहिन छ। नेपालले श्रीलंकासँग खेल्नुअघि माल्दिभ्सले भुटानको सामना गर्नेछ।

समूह ‘ए’ को विजेताले समूह ‘बी’ को उपविजेता तथा समूह बीको विजेताले समूह ए को उपविजेता सँग सेमिफाइनल खेल्नुपर्ने हुन्छ। भारत र बंगलादेश दुवैको प्रयास घरेलु टोली नेपालसँगको सम्भावित सेमिफाइनल भेटलाई टार्नु हुनेछ।

अघिल्लो संस्करणको सेमिफाइनल हारलाई भारतले पक्कै बिर्सेको छैन। त्यसअघि ५ पटकको विजेता भारत समूह चरणमा बंगलादेश र सेमिफाइनलमा नेपालसँग पराजित भएको थियो। यसपटक भारतले अघिल्लो संस्करणको त्यो हारलाई बिर्साउने प्रयास गर्नेछ।