काठमाडौं (हाम्रो खेलकुद)– फुटबलर्स मिसन टुगेदरको आयोजनामा जारी दोश्रो भेट्रान्स फुटबल प्रतियोगितामा मंगलवार त्रिभुवन आर्मी फुटबल क्लब, किङकम स्पोर्टस क्लब र एनआरटी विजयी भएका छन् ।

थिमीस्थित मध्यपुर युथ एसोसियसनको खेल मैदानमा भएको दिनको पहिलो खेलमा राजु तामाङ र सन्तोष नेपालीको समान २ गोलमा आर्मीले धरान सिटी एफसीलाई ५–२ ले पराजित गर्यो । आर्मीका लागि अर्को गोल हरि महतोले गरे ।

धरान सिटीका केन्द्र लिम्बु र सुरज कुमार श्रेष्ठले गोल गरे । आर्मीका राजु तामाङ प्लेयर अफ दी म्याच भए र उनलाई नेपाली सेना, भैरव वहान गुल्मका मेजर लेलिन थापा मगरले पुरस्कृत गरे ।

किङकमले फाप्ला स्पोर्टस क्लब, धनगढीलाई ८–१ के फराकिलो अन्तरले पराजित गर्यो । किङकम का निमा लामा र विजय महर्जनले समान २, राकेश श्रेष्ठ, चन्द्र तामाङ, र वालगोपाल साहुखल गोल गरे ।

फाप्लाका लागि अशोक चन्द्रले गोल गरे । किङकमका निमा लामा प्लेयर अफ दी म्याच भए र उनलाई नेपाल प्रहरीका पूर्व एआईजी अमर सिंह शाहले पुरस्कृत गरे ।
तेश्रो तथा अन्तिम खेलमा एनआरटीले वगर भाई खलक, पोखरालाई २–१ ले पराजित गर्यो । एनआरटीका लागि सुरज कुमार श्रेष्ठ र सुविन घिमीरेले गोल गरे । वगर भाई खलकका लागि गंगा तामाङले गोल गरे ।

एनआरटीका सुविन घिमीरे प्लेयर अफ दी म्याच भए र उनलाई मध्यपुर थिमी नगरपालिकाका वडा नम्बर ९ का वडा अध्यक्ष सानुकाजी राजवाहकले पुरस्कृत गरे ।

प्रतियोगितामा बुधवार पहिलो खेल एसएनकेसी, काठमाण्डौ र आर्मी तथा अर्को खेल ठमेल टुरिजम डेभलप्मेन्ट काउन्सिल र चितवन एफसीबीच हुने आयोजकले जनाएको छ ।