एजेन्सी – साउदी अरबको अल-हिलालसँग साविक विजेता युएईको अल-ऐनले एसियन च्याम्पियन्स लिग एलिटमा पराजित भएको छ ।

ऐनको घरेलु मैदान हज्जा बिन जायद स्टेडियममा सोमवार भएको खेलमा हिलाल ५-४ ले विजयी भएको हो ।

अल हिलालको जितमा सलेम अल–दौसारीले ह्याट्रिक गरे भने रेनान लोदी र सर्गेज मिलिन्कोभिच साभिचले समान १ गोल गरे । घरेलु टोलीका लागि भने सौफियनी रहिमीले ह्याट्रिक गर्दा माटेओ सानाब्रियाले १ गोल गरे ।

खेलको २६ औं मिनेटमा लोदीले गोल गर्दै हिलाललाई सुरुवाती अग्रता दिलाए । ऐनका लागि ३९औं मिनेटमा रहिमीले बराबरी गोल फर्काए । पहिलो हाफको इन्ज्युरी समयमा साभिचले गोल गर्दै हिलाललाई पुनः अग्रता दिलाए । लगत्तै दौसारीले पहिलो गोल गर्दै हिलालको अग्रता ३-१ मा पुर्‍याए ।

६३औं मिनेटमा सानाब्रियाले गोल गर्दै अल–ऐनलाई ३-२ को स्थितिमा ल्याए। तर, त्यस लगत्तै दौसारीले गोल गर्दै हिलालको अग्रता ४-२ मा पुर्‍याए । रहिमीले ६७ औं मिनेटमा दोस्रो गोल गर्दै ऐनलाई ४-३ मा पुर्याए । तर, ७५औं मिनेट दौसारीले अर्को गोल गर्दै ह्याट्रिक पूरा गरे र हिलाल ५-३ को स्थितिमा पुग्यो ।

अली अल बुलाहयीले ८२औं मिनेटमा रातो कार्ड पाएर मैदान छाडेपछि हिलालमाथि दबाब बढेको थियो । इन्ज्युरी समयमा पेनाल्टी पाएपछि रहिमीले गोल गर्दै आफ्नो ह्याट्रिक पूरा गरेपनि टोलीलाई जित दिलाउन सकेनन् ।

चोट मुक्त भएर पुनरागमन गर्ने क्रममा ब्राजिलियन स्टार नेयमार ७७ औं मिनेटमा मैदान प्रवेश गरेका थिए । हिलाल तीन राउन्डपछि ९ अंकका साथ लिग तालिकाको शीर्ष स्थानमा छ । ऐन समान खेलबाट १ अंकसहित ११औं स्थानमा छ ।