काठमाडौं (हाम्रो खेलकुद) – साफ महिला च्याम्पियनसिप २०२४ अन्तर्गत समूह बी को खेलमा भुटानले पहिलो जित दर्ता गर्ने क्रममा श्रीलंकालाई हराएको छ ।

दशरथ रंगशालामा भुटानले श्रीलंकालाई ४-१ ले पराजित गरेको हो । पहिलो हाफको सुरुवातमै भुटानले अग्रता लिएपनि श्रीलंकाले लगत्तै गोल फर्काएको थियो । तर सेट पिसमा श्रीलंकाको डिफेन्स कमजोर हुँदा भुटानले पहिलो हाफमै अग्रता बनायो । दोस्रो हाफमा कप्तान पेमाको दुइ उत्कृष्ट असिस्टमा भुटानले फराकिलो जित पक्का गर्यो ।

यस जितसँगै भुटान २ खेलमा ४ अंक जोडेर समूहको शीर्षस्थानमा उक्लिएको छ । श्रीलंकाको २ खेलमा ३ अंक छ भने नेपालको १ खेलमा १ अंक छ । माल्दिभ्स १ खेलमा विना कुनै अंक पुछारमा छ ।

पहिलो हाफको सातौं मिनेटमा नामग्याल डेमाको क्रसमा डेकी ल्जोहामले गोल गर्दै भुटानलाई सुरुवाती अग्रता दिलाइन् । बायाँ विंगबाट नामग्यालले दिएको लो क्रसमा पेनाल्टी क्षेत्रभित्र रहेका डिफेन्डर बिट हुँदा फार पोस्टमा अनमार्क रहेकी डेकीले सहजै गोल गरेकी हुन् ।

खेलको २३ औं मिनेटमा कप्तान मधुशिकाको गोलमा श्रीलंका खेलमा फर्कियो । भुटानकी डेकी याङदोनलाई लाग्दै रिबाउण्ड आएको बललाई उनले शक्तिशाली प्रहार गर्दै गोलरक्षक संगीता मोंगरलाई बिट गरेकी थिइन् ।

३२ औं मिनेटमा भुटानले दोर्जीको गोलमा पुन: अग्रता लियो । नामग्यालको फ्रिकिक प्रहार ६ यार्ड बक्सभित्र क्लियर हुन नसक्दा दोर्जीले गरेको प्रहारमा गोलरक्षक वीरसिंघे बिट भइन् ।

५४ औं मिनेटमा भुटानको अग्रता बढाउने प्रयासमा प्रविना परेराको गोललाइन क्लियरेन्स बाधक बन्यो । डेकी ल्हाजोमले पेनाल्टी क्षेत्र बाहिरबाट गरेको प्रहारमा गोलरक्षक पोजिसनमा नरहेपनि परेराले हेडर गर्दै गोलको खतरा टारिन् ।

७६ औं मिनेटमा डेकीले व्यक्तिगत दोस्रो गोल गर्दै भुटानलाई ३-१ को अग्रता दिलाइन् । कप्तान पेमाले डिफेन्स लाइनलाई झुक्याएर दिएको पासलाई डेकीले पहिलो टचमै फिनिस गरिन् । लगत्तै पेमाकै पासमा भुटानले अर्को गोल थप्यो । यसपटक नामग्यालले पेमाको उत्कृष्ट पासलाई पेनाल्टी क्षेत्रभित्र रोक्दै दोस्रो टचमा गोलरक्षकलाई बिट गरिन् ।

आज हुने दोस्रो खेलमा नेपाल र माल्दिभ्सले साँझ ५:३० बजे खेल्नेछन् ।