काठमाडौं (हाम्रो खेलकुद) – साफ महिला च्याम्पियनसिप २०२४ अन्तर्गत समूह बी को खेलमा भुटानले श्रीलंकामाथि पहिलो हाफमा अग्रता लिएको छ ।

दशरथ रंगशालामा पहिलो हाफको खेल सकिँदा भुटान २-१ को अग्रतामा छ । भुटानले सुरुवाती अग्रता लिएपनि श्रीलंकाले गोल फर्काएको थियो । तर सेट पिसमा श्रीलंकाको डिफेन्स कमजोर हुँदा भुटानले पुन: अग्रता बनाएको हो ।

पहिलो हाफको सातौं मिनेटमा नामग्याल डेमाको क्रसमा डेकी लाजोमले गोल गर्दै भुटानलाई सुरुवाती अग्रता दिलाइन् । बायाँ विंगबाट नामग्यालले दिएको लो क्रसमा पेनाल्टी क्षेत्रभित्र रहेका डिफेन्डर बिट हुँदा फार पोस्टमा अनमार्क रहेकी डेकीले सहजै गोल गरेकी हुन् ।

खेलको २३ औं मिनेटमा कप्तान मधुशिकाको गोलमा श्रीलंका खेलमा फर्कियो । भुटानकी डेकी याङदोनलाई लाग्दै रिबाउण्ड आएको बललाई उनले शक्तिशाली प्रहार गर्दै गोलरक्षक संगीता मोंगरलाई बिट गरेकी थिइन् ।

३२ औं मिनेटमा भुटानले दोर्जीको गोलमा पुन: अग्रता लियो । नामग्यालको फ्रिकिक प्रहार ६ यार्ड बक्सभित्र क्लियर हुन नसक्दा दोर्जीले गरेको प्रहारमा गोलरक्षक वीरसिंघे बिट भइन् ।

समूह बी मा श्रीलंकाको ३ अंक छ भने नेपाल र भुटानको १-१ अंक छ । आज हुने दोस्रो खेलमा नेपाल र माल्दिभ्स खेल्नेछन् । पहिलो खेलमा श्रीलंकाले माल्दिभ्सलाई १-० ले हराउँदा नेपाल र भुटानले गोलरहित बराबरी खेलेका थिए ।