काठमाडौं (हाम्रो खेलकुद)– महिला साफ च्याम्पियनसिपका सेमिफाइनल सम्भावना बढाउनका लागि नेपाली टोलीले माल्दिभ्सविरुद्ध हुने आजको खेल जित्नुपर्ने हुन्छ ।

भुटानसँगको पहिलो खेलमा गोलरहित बराबरीमा रोकिएका केहि दबाब र आलोचना खेपेको नेपाली टोली आज जितेर सेमिफाइनलको आधार तयार पार्नेमा जुट्नेछ । तुलानात्मक रुपमा माल्दिभ्स कमजोर टोली हो । माल्दिभ्स पहिलो खेलमा श्रीलंकासँग १–० ले पराजित भएको थियो ।

सावित्रा भण्डारी सम्बा फ्रान्सबाट आज बिहानमात्र स्वदेश आइपुगेकी छिन् । उनको आगमनबाट टोली उत्साहमा रहेको छ । उनी खेल्न तयारी भएको अवस्थामा खेलाउने टोलीका मुख्य प्रशिक्षक राजेन्द्र तामाङले बताएका छन् ।

साम्बा त्यस्तो खेलाडी हुन्, जो हरसम्भव टोलीबाट खेल्नका लागि उत्साहित र प्रतिबद्ध रहने गरेकी छिन् । त्यसैले उनले माल्दिभ्सविरुद्धको खेलमा सुरुवात गर्ने सम्भावना छ ।

नेपाल र माल्सिभ्सले साँझ ५ः३० बजे खेल्नुअघि अर्को खेलको नतिजा आइसक्ने छ । त्रिपुरेश्वस्थित दशरथ रंगशालामा अर्को खेल दिउँसो १ः३० बजे भुटान र श्रीलंकाबीच हुनेछ । समूह बीमा श्रीलंकाको ३, नेपाल र भुटानको समान १ तथा माल्दिभ्स अंक विहीन ।

भुटानसँगको खेलमा घाइते भएका हिराकुमारी भुजेल र दीपा शाहीले च्याम्पिनसिप गुमाएको प्रशिक्षक तामाङले बताएका छन् । यद्दपी अखिल नेपाल फुटबल संघले उनीको अवस्थाका बारेमा आधिकारिक जानकारी भने दिएको छैन ।

समूह एमा आइतबार बंगलादेश र पाकिस्तानले १–१ को बराबरी गरेपछि अन्तिम खेलबाट मात्र सेमिफाइनल पुग्ने टंगो लाग्नेछ । पहिलो खेलमा पाकिस्तानलाई ५–२ ले हराएको भारत सेमिफाइन पुगिसकेको छ । बुधबार भारत र बंगलादेशको खेलपछि समूहको विजेता उपविजेताको टुंगो लाग्नेछ ।