हिमाल खरेल,बिर्तामोड

झापा-११ फुटबल क्लब सातौँ अन्तर्राष्ट्रिय आमन्त्रण बेलबारी गोल्डकप फुटबल प्रतियोगिताको सेमिफाइनलमा प्रवेश गरेको छ ।

लगातार दोस्रो जित निकाल्ने क्रममा भोजपुर जिल्ला फुटबल संघलाई आइतवार ३-० ले पराजित गर्दै झापा-११ अन्तिम चारमा पुगेको हो ।

बेलबारी-११ लक्ष्मीमार्गस्थित लक्ष्मी खेल मैदानमा भएको पहिलो क्वार्टर फाइनल खेलको दोस्रो मिनेटमै निरज कार्कीको गोलबाट अग्रता लिएको थियो ।

त्यस्तै, झापाका लागि प्रदीप बुढाथोकीले दोस्रो हाफको ३४ औँ मिनेटमा गोल थप्दै २-० को अग्रतामा पुर्‍याएका थिए ।

इन्ज्युरी समयमा प्रदीपले नै व्यक्तिगत दोस्रो गोल गर्दै झापाको जित निश्चित बनाएका थिए । निरज कार्की खेलको प्लेयर अफ द म्याच घोषित भए । उनले ५ हजार रुपैयाँ पुरस्कार पाए ।

यसअघि शुक्रवार उद्घाटन खेलमा पाहुना टोली कञ्चनजंगा फुटबल क्लब भारतमाथि ५-१ गोल अन्तरको फराकिलो जित निकाल्दै झापाले क्वार्टर फाइनलमा स्थान पक्का गरेको थियो ।

प्रतियोगितामा सोमवार दोस्रो क्वार्टर फाइनलमा राजारानी फुटबल क्लब धनकुटा र चित्लाङ फुटबल क्लब काठमाडौँबीच प्रतिस्पर्धा हुने आयोजकले जनाएको छ । प्रतियोगिताको विजेताले ८ लाख र दोस्रो हुने टोलीले ४ लाख रुपैयाँ प्राप्त गर्ने छ।