काठमाडौं (हाम्रो खेलकुद) – साफ महिला च्याम्पियनसिप २०२४ अन्तर्गत साविक विजेता बंगलादेश पाकिस्तानसँग हारबाट जोगिएको छ । समूह ए को दोस्रो खेलमा पाकिस्तानले दोस्रो हाफको इन्ज्युरी समयमा गोल खाँदै १-१ को बराबरी खेलेको हो ।

पहिलो हाफमा लिएको अग्रता जोगाएपछि पाकिस्तानले साविक विजेतालाई स्तब्ध बनाउन नजिक पुगेपनि अन्तिम समयमा गोल खान पुग्यो । बराबरीका बाबजुद पाकिस्तानको सेमिफाइनलमा पुग्ने सम्भावना भने जीवित छ । बंगलादेशले अन्तिम चारमा प्रवेश गर्न अब भारतविरुद्ध २ गोल वा कमको हार बेहोरेपनि पुग्नेछ ।

पहिलो खेलमा भारतले पाकिस्तानलाई ५-२ ले हराउँदै ३ अंक जोडिसकेको छ । बंगलादेश र पाकिस्तानको १-१ अंक छ ।

दशरथ रंगशालामा सम्पन्न खेलको २१ औं मिनेटमा बंगलादेशकी ऋतु चक्माले बायाँ विंगबाट दिएको क्रसमा ६ यार्ड बक्सभित्र उनकै टोलीका ३ खेलाडीले बल छुन नसक्दा गोलको अवसर टर्यो । २४ औं मिनेटमा पाकिस्तानको गोल गर्ने अवसरमा गोलरक्षक रुपना चक्मा बाधक बनिन् । सुहा हिरानीले झन्डै ३५ यार्ड टाढाबाट गरेको प्रहारलाई रुपनाले मुस्किलले बाहिर पठाएकी थिइन् ।

३२ औं मिनेटमा पाकिस्तानले जाहमेना मालिकको गोलमा अग्रता लियो । रमीन फरिदले मिडफिल्डबाट दिएको लामो पासमा शिउली अजिमको ब्याकपास फितलो रहँदा जाहमेना पहिलो टचमै रुपना चक्मालाई बिट गर्दै गोल गरिन् ।

४२ औं मिनेटमा बंगलादेशकी ऋतुले पेनाल्टी क्षेत्र बाहिरबाट गरेको प्रहारमा गोलरक्षक निशा अशरफ बिट भएपनि क्रसबार बाधक बन्द बंगलादेश बराबरी गर्नबाट बन्चित भयो ।

दोस्रो हाफमा पनि बंगलादेशले लगातार आक्रमण गर्यो तर गोल फर्काउन संघर्ष जारी रह्यो । तर ७७ औं मिनेटमा पाकिस्तानले अग्रता दोब्बर पार्ने अवसर भने गुमायो । जाहमेनाको पासमा अफसाइड ट्रयाप बिट भएको अवस्थामा अमिना हनिफले वन भर्सेस वनमा गोल गर्न सकिनन् । गोलरक्षक रुपना चक्माले अघि बढेर उनलाई दोस्रो टच लिन दिइनन् ।

इन्ज्युरी समयको पहिलो मिनेटमा बंगलादेशले गोल फर्कायो । ऋतुले बायाँ विंगबाट दिएको क्रसलाई सम्सुनाहर जुनियरले गोलको दिशा दिएकी थिइन् । गोलरक्षक निशाले बल रोक्न सकिनन् र बंगलादेशले बराबरी गोल पायो ।

पहिलो खेलमा पाकिस्तान भारतसँग ५-२ ले पराजित भएको थियो । समूहको अन्तिम खेल भारत र बंगलादेशबीच बुधबार हुनेछ । समूह बी अन्तर्गत पहिलो खेलमा १:३० बजे भुटान र श्रीलंका तथा ५:३० बजे नेपाल र माल्दिभ्स भिड्नेछन् ।