काठमाडौं (हाम्रो खेलकुद)- पाँच पटकको उपविजेता रहिसकेको नेपालका लागि साफ च्याम्पियनसिपको यस पटकको सुरुवात सुखद हुन सकेन।

साफ इतिहासमा नै नेपालले पहिलो पटक बराबरी नतिजाको सामना गर्नुपर्यो। पहिलो पटक भुटानले नेपाललाई बराबरीमा रोक्यो।

बराबरीको पीडासँगै नेपालका दुई महत्वपूर्ण खेलाडी हिरा कुमारी भुजेल र दीपा शाही चोटग्रस्त हुन पुगे। उनीहरूले साफको बाँकी खेल गुमाउने संभावना उच्च रहेको छ।

सुरुवाती रोजाइमा खेलेकी डिफेन्डर हिरा चोटको कारण पहिलो हाफमा मैदान छोड्न बाध्य भएकी थिइन्। उनलाई तत्कालै एम्बुलेन्समा हालेर अस्पताल लगिएको थियो। दोस्रो हाफको सुरूवातमा नै सरू लिम्बुलाई रिप्लेस गर्दै मैदान छिरेकी मिड फिल्डर दीपा पनि चोटको कारण ७२औं मिनेटमा मैदान छोड्न बाध्य भइन्।

खेल पछि पोस्ट म्याच कन्फरेन्समा प्रशिक्षक राजेन्द्र तामाङलाई खेलाडीको अवस्था बारे सोध्दा उनले बाँकी खेलको लागि रेष्टमा नै हुनेछन् भनेर प्रतिक्रिया दिएका छन्।

तामाङले दुवै खेलाडीलाई घुँडामा चोट लागेको र एसिएलको समस्या रहेको भनेर टिम डाक्टर र फिजियोले जानकारी दिएको जानकारी दिए। पहिलो खेलमा नै दुई खेलाडी घाइते हुँदा बाँकी खेलमा नेपाललाई समस्या हुन सक्छ।

दुवै खेलाडीलाई बी एण्ड बी अस्पताल लगिएको थियो। केहि समय अगाडि खेलाडीहरूलाई होटल फर्काइएको छ। भोलि एमआरआई लगायतको थप उपचार गरिने बताइएको छ।