काठमाडौं (हाम्रो खेलकुद) – साफ महिला च्याम्पियनसिपमा आज आयोजक नेपालले भुटानसँग खेल्दैछ । नेपाल जितबाट प्रतियोगिताको सुरूवात गर्ने दाउमा रहनेछ ।

छोटो तयारीका बाबजुद नेपाली टिमले उपाधि जित्ने लक्ष्य बनाएको छ। यसको लागि आज जितबाट सुरूवात गर्न जरूरी छ। दशरथ रङ्गशालामा साँझ ५:३० बजे हुने खेलमा नेपाललाई घरेलु दर्शकको साथ रहनेछ ।

आजको खेलमा नेपालकी महत्त्वपूर्ण खेलाडी साबित्रा भण्डारी अनुपस्थित हुनेछिन् । फिफा विन्डोमा नपरेको कारण उलाई क्लबले रिलिज नगरेको हो । उनी आईतबार नेपाल आउनेछिन । रेखा पौडेल भने नेपाल आइसकेकी छिन् ।

नेपाल पाँच पटकको फाइनलिष्ट टिम हो । भुटान भने अहिलेसम्म फाइनलमा पुग्न सकेको छैन । सातौं संस्करणको च्याम्पियनसिप जारी रहँदा पहिलो पाँच संस्करण भारतले लगातार जितेको थियो । पछिल्लो संस्करण भने बङ्गलादेशले जितेको थियो ।

अहिलेसम्म मात्र दुई राष्ट्रले साफ च्याम्पियनसिपको उपाधि जितेका छन् । नेपाल पाँच पटक फाइनलमा हारेको पिडा बिर्साउँदै यो पटक च्याम्पियन हुने दाउमा रहेको छ ।

यो पटक नेपाल ग्रुप बीमा भुटान, श्रीलंका र माल्दिभ्ससँग रहेको छ । ग्रुप एमा ५ पटकको च्याम्पियन भारत डिफेन्डिङ च्याम्पियन बङ्गलादेश र पाकिस्तान रहेका छन् । हिजो भएको उदघाटन खेलमा भारतले पाकिस्तानलाई ५-२ गोल अन्तरले हराएको थियो

आजै हुने पहिलो खेलमा भने श्रीलंका र माल्दिभ्सबीच प्रतिस्पर्धा हुनेछ । सो खेल दिउँसो १:३० बजे दशरथ रङ्गशालामा हुनेछ।