3 hours ago
October 16, 2024
सुबास हुमागाईं, काठमाडौं
साफ महिला च्याम्पियनसिपको सातौं संस्करण विहीबार दशरथ रंगशालामा सुरु हुँदैछ । नेपालमा लगातार तेस्रो पटक आयोजना हुन लागेको प्रतियोगिताको पूर्वसन्ध्यामा भारतले आफ्नो पुरानो दवदवा कायम राख्ने लक्ष्य राख्दा साविक विजेता बंगलादेश र नेपालले पनि उपाधि जित्ने लक्ष्य रहने बताएका छन् ।
प्रतियोगिताको पूर्व सन्ध्यामा सहभागी सातै टोलीले आ-आफ्नो तयारी र लक्ष्यबारे अभिव्यक्ति दिँदा भारतका अनुभवी प्रशिक्षक सन्तोष कश्यपले अनुभवी खेलाडी टोलीमा फर्कंदा टोली थप बलियो भएको बताए । उनले महिला फुटबलमा आफ्नो पहिलो जिम्मेवारी रहेपनि टोलीमा रहेका खेलाडीले आफ्नो योजनाबारे बुझेको र तयारी राम्रो रहेको आफ्नो बुझाइ सुनाए ।
टोलीकी कप्तान आशालता देवीले पनि विगतभन्दा टोली यसपटक बलियो रहेको बताइन् । उनले पछिल्लो पटक धेरै युवा खेलाडी रहेकाले अपेक्षित नतिजा नआएको र यसपटक अनुभवी खेलाडीको पुनरागमनसँगै टोली थप बलियो रहेको बताइन् । उनले नेपालमा सधैं दर्शकको बाक्लो उपस्थिति रहने भएकाले पनि खेल्न निकै उत्सुक रहेको जानकारी दिइन् ।
यता बंगलादेशका प्रशिक्षक पिटर बटलरले भने टोलीमा केही परिवर्तन गर्दा आलोचना हुनु स्वभाविक भएपनि टोलीको हितका लागि उक्त कदम चालेको बताए । युवा खेलाडी टोलीमा समेट्दा भविष्यका लागि पनि राम्रो हुने र हालको योजना अनुसार पनि रहेको उनले बताए ।
यता कप्तान सविना खातुनले भने नयाँ प्रशिक्षकको आगमनपछि टोलीले पर्याप्त समय पाएको र नयाँ योजनामा भिजेको बताइन् । पछिल्लो पटक बंगलादेशले उपाधि जित्दा गोलाम रोबानी छोटो टोलीका प्रशिक्षक थिए । झन्डै दशक लामो जिम्मेवारीपछि उनलाई संघले प्रतिस्थापन गरेको थियो ।
नेपालका प्रशिक्षक राजेन्द्र तामाङले आफ्नो सिद्धान्तमा खेल्न टोलीलाई सक्दो सिकाएको बताए । तयारीका लागि २ साता समय मात्र प्राप्त गरेपछि नयाँ खेलाडीलाई भने टोलीमा समेट्न नसकेको उनको भनाइ थियो । ‘नयाँ खेलाडी एक्कासी टिममा राख्दा मेरो योजना नबुझ्ने डर भयो । यसअघिको एक महिने क्याम्पमा पुराना खेलाडीसँग लामो तयारी भएको थियो । त्यसैले पुराना खेलाडीलाई नै समेटेर टोली निर्माण गरेको हुँ,’ तामाङले भने ।
कप्तान एन्जिला तुम्बापो सुब्बाले पनि टोलीको तयारी सन्तोषजनक रहेको र यसपटक उपाधि जित्ने विश्वास रहेको अभिव्यक्ति दिइन् । उनले घरेलु भूमिमा आयोजना भएपनि दशरथ रंगशालामा प्रशिक्षण गर्ने अवसर नपाउँदा घरेलु मैदानको फाइदा लिन नसकेको दुखेसो पोखिन् ।
अष्ट्रेलियन प्रशिक्षक निकोल डीमेनले यसपटक भुटानी टोली सम्हाल्दैछिन् । यसअघि पपुवा न्यु गिनीको राष्ट्रिय टोलीबाट क्षेत्रीय उपाधि जितेकी उनले दक्षिण एसियाको फुटबल भने फरक रहेको बताइन् । उनले टोलीका खेलाडी घरेलु लिगमा खेलेर फर्किएको र युवा टोली रहेकाले आशावादी रहेको बताइन् ।
यता कप्तान पेमा छोदेनले नेपालसँगको पहिलो खेल महत्त्वपूर्ण हुने बताउँदै आफ्नो टोली तयार रहेको अभिव्यक्ति दिइन् । उनले सावित्रा भण्डारी टोलीमा नहुनुले भुटानलाई केही सहज हुने भएपनि अहिलेलाई आफ्नै टोलीमा ध्यान दिने बताइन् ।
माल्दिभ्सका प्रशिक्षक मोहमद निजामले टोलीको तयारी राम्रो रहेको र हरेक खेललाई महत्त्व दिएर खेल्ने बताए । कप्तान हव्वा हनिफाले भने फुटबल संघले महिला फुटबललाई प्राथमिकतामा नराख्दा राम्रो तयारी गर्न नपाएको दुखेसो पोखिन् ।
श्रीलंकाका प्रशिक्षक मोहमद हसन रुमी र कप्तान थुसानी मधुसिकाले पनि मैदानको अभाव र मौसमको असरले गर्दा यसपटक तयारी राम्रो हुन नसकेको जानकारी दिए ।
पाकिस्तानका प्रशिक्षक आदील रिज्कीले पछिल्लो पटकको तुलनामा यसपटक टोलीमा परिवर्तन रहेको जानकारी दिए । उनले त्यसबेला युवा रहेका खेलाडीमा अनुभव थपिएको र यसपटक पुनरागमन भन्दा प्रदर्शनमा बढी ध्यान दिने पनि बताए ।
कप्तान मारिया खानले यसपटक टोलीले मैदानमा नतिजाका लागि खेल्ने बताउँदै अघिल्लो संस्करणभन्दा यसपटक टोलीको फरक प्रदर्शन देखाउने विश्वास दिलाइन् ।
प्रतियोगितामा ७ टोलीको सहभागिता रहँदा समूह ए मा साविक विजेता बंगलादेश, ५ पटकको च्याम्पियन भारत र पाकिस्तान रहेका छन् । समूह बी मा आयोजक नेपाल, भुटान, श्रीलंका र माल्दिभ्स रहेका छन् । दुवै समूहका शीर्ष २ टोली सेमिफाइनलमा पुग्नेछन् ।
October 16, 2024
काठमाडौं (हाम्रो खेलकुद)- अखिल नेपाल फुटबल संघ (एन्फा) ले साफ महिला च्याम्पियनसिपको टिकट विक्रीको २० प्रतिशत रकम राष्ट्रिय महिला फुटबल टोलीलाई दिने घोषणा गरेको छ। साफ सुरु हुनुअघि नै महिला टोलीले १६ लाख रुपैयाँ पाउने पक्का भएको हो। ८० लाख रुपैयाँमा एन्फाले माउन्टेन एभरेष्ट स्पोर्टस एन्ड इभेन्टस प्रालिलाई टिकट विक्रीको जिम्मेवारी दिनेको सम्झौता गरिसकेकोले टोलीले […]
October 16, 2024
सरिता श्रेष्ठ, काठमाडौं साफ वुमन्स च्याम्पियनसिपमा आयोजक नेपाल यो पटक पनि दाबेदार मध्ये एक टोली हो। दाबेदार हुँदाहुँदै पनि फाइनल खेल जित्न नसक्ने नेपाली टोलीको छवि बनेको। यसअघिका ६ संस्करणमा नेपालले एउटामा बाहेक सबै फाइनल खेलेको छ। बिडम्बना पाँचै पटक फाइनलमा हारेको तितो अनुभव नेपालसँग छ। त्यसो त ६ मध्ये ५ पटक फाइनलमा पुग्नु पनि […]
October 16, 2024
काठमाडौं (हाम्रो खेलकुद) – दशरथ रंगशालामा बिहीवार सुरु हुने साफ महिला च्याम्पियनसिपको टिकट मोबाइल एपबाट पनि खरिद गर्न सकिने भएको छ । दक्षिण एसियाली महिला फुटबलको यस प्रतिष्ठित प्रतियोगिताको सातौं संस्करण कात्तिक १ गतेदेखि दशरथ रंगशालामा हुँदैछ । प्रतियोगिताको लागि टिकट विक्री गर्न अखिल नेपाल फुटबल संघ (एन्फा) सँग माउन्ट एभरेष्ट स्पोर्ट एण्ड इभेन्ट प्रा. […]