एजेन्सी – इङ्ग्लिस प्रिमियर लिग(इपिएल) फुटबलमा टोटनहम हट्सपर ब्राइटनसँग पराजित हुँदा म्यानचेस्टर युनाइटेड र चेल्सीले अंक बाँडेका छन् ।

ब्राइटनको घरेलु मैदानमा आइतवार बेलुका भएको खेलमा टोटनहम ३–२ ले पराजित भयो । ब्राइटनको जितमा यान्कुबा मिन्टे, जर्जिन्हो रुटेर र डानी वेलबेकले समान १ गोल गरे । टोटनहमका लागि ब्रेनन जोनसन र जेम्स म्याडिसनले गोल गरेका थिए ।

खेलमा सुरुवाती अग्रता भने टोटनहमले लिएको थियो । टोटनहमका लागि २३औं मिनेटमा जोनसनले अग्रता दिलाएका थिए । म्याडिसनले खेलको ३७औं मिनेटमा गोल थप्दै टोलीको अग्रता दोब्बर बनाएका थिए । दोस्रो हाफमा ब्राइटनले ३ गोल फर्कायो । ४८औं मिनेटमा मिन्टेले गोल गर्दै ब्राइटनलाई खेलमा फर्काए । रुटेरले ५८औं र वेलब्याकले ६६औं मिनेटमा गोल गर्दै ब्राइटनलाई पुरागमन जित दिलाए ।

आइतबार बेलुका नै भएको खेलमा अर्को खेलमा म्यानचेष्टर युनाइटेड एष्टन भिल्लासँग गोलरहित बराबरीमा रोकियो ।

अर्को खेलमा चेल्सीले नटिंघम फरेष्टसँग १–१ को बराबरी खेल्यो । खेलमा अग्रता फरेष्टले बनायो । ४९औं मिनेटमा फरेस्टका क्रिस वूडले गोल गरे । ५७औं मिनेटमा चेल्सीका नोनी माडुकेले गोल गर्दै खेल बराबरीमा सकाएका हुन् ।

७ सातौं चरणको खेलपछि १८ अंकको लिभरपुल शीर्ष स्थानमा छ । चेल्सी १४ अंकसहित चौथो र एष्टन भिल्ला पनि समान अंकसहित पाँचौं स्थानमा छ । ब्राइटन १२ अंकसहित छैटौं स्थानमा उक्लियो । समान १० अंकका साथ टोटनहम र नटिंघम फरेष्ट नवौं र दशौं स्थानमा छन् । युनाइटेड ८ अंकसहित १४औं स्थानमा छ ।