काठमाडौं (हाम्रो खेलकुद)- पहिरोमा परि एन्फा एकेडेमी सिस्नेरीमा रहेका ६ युवा खेलाडीको मृत्यु भएको र अन्य क्षतिको अध्ययन गर्न छानविन गर्न संसदीय छानबिन समिति बन्ने भएको छ।

असोज ११ गते लगातार वर्षापछि एकेडेमी ४० युवा खेलाडीलाई अन्यत्र लैजाने  क्रममा बाटोमा ६ जनाको मृत्यु भएको बताइएको थियो।

पूर्वाधार विकास समितिको शुक्रवार‌ बसेको बैठकले छानबिन समिति बनाउने निर्णय गरेको सभापति दीपकबहादुर सिंहले जानकारी दिए । 

‘६ युवा खेलाडीको मृत्यु भएको छ । त्यसदिन के कस्तो भएको हो।कुलेखानीलगायत त्यसआसपास भएका क्षति र त्यसको कारण के हो । त्यसका विषयमा छानविन समिति बनाउने निर्णय भएको छ। दशैंपछि समितिलाई पूर्णता दिनेछौं।’

समितिका सदस्य माधव सापकोटाले युवा खेलाडीको मृत्यु हुनुमा व्यवस्थापनको कमजोरी देखिएको भन्दै संसदिय छानबिन समिति गठनको माग गरेका थिए।

६ खेलाडीको विसुद्ध प्राकृतिक विपत्तिका कारण मात्र नभइ व्यवस्थापनको लापरवाहीका‌ कारण घटना भएकोले गम्भिररतापूर्वक छानबिन गर्नुपर्ने सापकोटाको भनाई थियो।

एन्फा एकेडेमीमा ४० युवा खेलाडी रहेका थिए। ६ खेलाडीको मृत्युपछि असोज १२ गरे ४ स्थानिय बाहेक ३० जनालाई हेलिकप्टरमार्फत काठमाडौं ल्याइएको थियो।